Excise & Narcotics sum chingpen thu ah officer 2 thiam loh chantir

Excise & Narcotics sum chingpen
thu ah officer 2 thiam loh chantir
Excise & Narcotics Department Office, Serchhip District sum cheng nuai 181 chuang chu a hmanna tur ni loah lakchhuaha hman a ni a. He thilah hian officer pahnih chu court-in thiam loh a chantir.
Prevention of Corruption Act special judge Dr HTC Lalrinchhana court chuan he eiruk thubuaia thutlukna hi Zirtawpni khan a puang a. Court-in a sawi danin, 2009 kum chanve hnulam atanga Excise & Narcotics Department Office, Serchhipa superintendent-a awm H Rongura chuan August 2010 atanga January 2017 inkar khan an staff hlawh tur, bill 106 an siam atangin hlawh tur zat ngai renga siam siin, a grand total-ah hlawh atana ngai aia tam bank atangin a naute a lakchhuah tir thin a, hengah hian ama personal bank account bakah a chhungte account leh a hnuaia thawk constable, driver adt. account chu sum transfer-na atan hmansakin, a sumfaiin a draw chhuah tir leh a, amah hi an pe thin a ni.
A hmanna tur dik tak ni loa H Rongura’n sum a draw chhuah tir zawng zawng hi Rs. 1,81,58,871 a ni a; hemi atanga Rs. 8,10,506 hi an office mamawh, bungrua leh thildang leina atan bakah bill pek ngai pekna atante hmangin, evidence atanga a lan dan chuan, a bak Rs. 1,73,48,365 chu chheprelh a ni.
END Office, Serchhipa thawktu thenkhat, sum lam kaihhnawih khawihtute pawh he thubuai chhui lai hian thu zawhfiah an ni a, mi pahnih chu an pu berin ti tura a tih anga ti mai an nih avangin court chuan eiruknaa inhnamhnawih an nihna a hmu loa, a dang pakhat, cashier Sainguri Chenkual chu a bank account-ah sum dahluh a ni ve tih hriat niin, hei erawh a bul tumtu bera puh H Rongura hian office mamawha hman tura pe nia a insawi avangin, eiruk sum ngei a ni tih finfiahna tur a awm lo anga ngaih a ni a, sawrkar witness-ah tantirin court hian thiam loh a chantir lo a ni.
A bul tumtu bera puh H Rongura’n Treasury Office lamah thurualpui nei nia a insawi avangin, a tira he thubuai chhui tantirha a hming sawilan tel loh, hetih hunlaia Serchhipa assistant account officer Suakngura pawh chhuizui a nihnaah, Rs. 41,000 a lo dawng ve tih hriatchhuah a ni bawk.
Heti hian Serchhipa Excise & Narcotics superintendent a nih laia H Rongura sum eiruk zawng nia chhut chu Rs. 1,73,48,365 a ni a, office tula an lo hmanral Rs. 8,10,506 erawh, ‘crime’ hnuaia sawi theih niin court hian a ngai loa, department-in disciplinary proceedings a kalpuina turah erawh a ngai thung.
He case chhuitu Anti Corruption Bureau-in a chhuina kimchang court-a an thehluh hnu ah court hian an chungthu a ngaihtuah a, thuhretu mi 43 vel koh an ni. H Rongura’n sumfai leh rohlu dang a neih dan te, bank kaltlanga sum chetvel dan kimchang leh document dangte zirchian a nih hnu ah, court hian H Rongura leh Suakngura te hi thiam loh a chantir a. Bail an dilna ang chi reng reng chu remtih loh niin, Zirtawpni la la hian Central Jail-ah dahluh an ni a, March 20 – Thawhtanni hian hrem an nih dan tur court hian a puang ang.
He thil hi Comptroller & Auditor General of India Report-a Serchhipa Excise & Narcotics office-ah cheng nuai 176 hman dik loh a awm nia a hriat a tarlan, Excise & Narcotics hotuten FIR an thehluh bawhzuia ACB-in a chhuichiannaa haichhuah a ni.