Exit Poll tak tak awm lo

Miin vote a thlak a, polling area a chhuahsan
hnuah a ngaihdan an lo zawt a, chutianga an tih chu exit poll tia sawi thin a ni. Methodology fel tak a awm bawk. Chutianga uluk taka an ti chung pawh chuan dik lo fe fe a la awm thei. Tun tum inthlanah khan Mizorama polling station hrang hrangah chutiang lo ti, voter-te lo changa lo kawm an awm em?
Mizoram mite’n khawi emaw laiah an lo ti a ni thei a, an puangzar zui lo pawh a ni thei. Mizoram pawn atanga rawn ti an awm em? Chutiang an ti lai lo hmu emaw an kawm emaw an awm em?
Ningani zan atang khan Mizoram inthlan chungchanga exit poll result a darh a, state pawna mite buatsaih niin, India ram media lian ber berin an chhuah. Mahse vote thlak ni-a Mizorama chutiang an rawn tih thu sawi tur hria an awm lo mai thei.
Thu dawn danin, Mizoram state pawna mite hian Mizorama voter tu tu emaw an berawn a, an ngaihdante lain an thlirna te an chhinchhiah a, chuta tang chuan “exit poll’ result hi an siam ta a ni. Hetiang hi exit poll a ni lo han tih theih chu a ni bik lo mai thei.
An mi biakate hi politics hria leh thlir thiam tura an ngaihte nia hriat an ni a, an result siam pawh awih theih tak tur pawh a ni.
“Mi pathum paliin min bia a, mi dang pawh an bia tih ka hria. Chung atang chuan an rin dan an tlangzarh ta a nih hmel,” zirtirtu pakhat chuan a ti.
Mizoramin inthlan result a hre tep a, tute nge sorkar ang tih erawh hriat a har nge ni dawn, exit poll an tihah pawh hian sorkar tura rin a inang lo zung mai.
Tun tum inthlan hi Mizoram politics-ah thil danglam tak a nihna a awm; party lian pathum an awm a, party lian pathumte inbeihna a ni. MNF, ZPM leh Congress party-te an lian a, MLA nei tam lo an awm a nih pawhin inthlan hmasate ang lo takin pathumnain vote an hmu hnem thei.
Inthlan hmasaah chuan party lian pathum inbeih hi a awm lo tiin a sawi theih a, party lian pahnihin sorkarna an inchuh tlangpui. A tling zawk tan pawh hneh taka tlin theih a ni thin. Tun tumah chuan party lian pathum an awm a, MLA nei tlem chung pawha vote hmu teuh a awm theih.