Pathiannia Qatar Grand Prix an tlan zawh khan Formula One driver tam zawk chuan boruak lum lutuk tawrh hrehawm an tihzia hahipin an sawi hlawm a, Mercedes driver George Russell phei chuan Qatar GP kha tawrawt leh rawng lutuk (brutal) tiin a sawichhuak hial a, boruak lum zawng tehnaa 30C chunglama intlansiak an nih avang leh boruak lum hnawng uap churh tuar loin race zawh khan driver thenkhat phei chu damdawi thiamte en zui an ngai hial a, F1 thuneitu sangber FIA chuan calendar thlakdanglam chungchang an ngaihtuah tan thu an puang ta hial a ni.
Doha khawpuia Lusail International Circuit-ah khan Alpine driver Esteban Ocon pawhin a helmet chhanah a luak bawrh bawrh tih a sawi!
Motorsport thuneitu sangber FIA thu-chhuah chuan Qatar race khati taka tawrh hrehawm a ni kha driver leh team-te bei-sei piahlam a nih thu tarlangin, an hriselna leh himna atana hlauh-awm pha a nih thu an sawi a, “FIA chuan hma lam huna tawrh harsa khawp din-hmuna driver-te an din tawh lohna tura rawt-na tha nei thei turin Qatar dinhmun zir-chianna tan nghal a ni.
“Kum thara Qatar Grand Prix chu tun aia thlasik hnaih lam kum tawp zawkah dah a ni a, hetih hunah hi chuan khawlum pawh ziaawm tawh zawk tura beisei a ni a, FIA chuan he harsatna sukiang tur hian theihtawp a chhuah zel ang,” tiin.
Tarlan tawh angin, George Russell khan khawlum lutuk leh boruak uap hnawng bawk si avang khan a thidang lek lek tih a sawi a; Williams driver Logan Sargeant phei kha chuan boruak zo loin intlansiak a tawp-san hlawl a nih kha!
American Sargeant-a team-mate Alex Albon phei chu medical centre lama hruai ngai hial khawpin a talbuai a, lum ti lutuk enkawlna, acute heat exposure an tih hmanga enkawl a ngai hial!
FIA thuchhuah chuan Paris khuaa medical commission meeting-ah Qatar-a thil thleng ang kha pumpelh a nih theihna’n an sawiho dawn tih an tarlang tel.
F1 calendar ennawn tum
