‘Swachhata Hi Seva’ campaign kalpui mekah nimin khan India ram pum huapa faina hnatlang thawh ni, ‘Ek Din, Ek Ghanta, Ek Sath: Nationwide Voluntary Shramdhaan’ hman a ni a, Mizoramah pawh district hrang hrangah faina hnatlang neih a ni.
Sawrkar laipuiin ram pum huap anga faina hnatlang a huaihawt hi chu ‘zeuh’ a ni mai a, Mizoram tluka faina hnatlang nei uar hi an awm kher lo maithei.
Faina hnatlang kan nei uar a, mahse kan fai mawh. Faina hnatlang neih hi a tha em em, a tha kan tih avanga uar em em ta pawh kan ni. Mahse, heti taka faina hnatlang kan uar chung pawh hian faina lamah hma kan sawn mawh em em mai hi kalphung (system) her danglam ve deuh chu kan mamawh tih a chiang reng mai.
Faina hnatlang bakah, ‘faina awareness campaign’ pawh kan kalpui nasa, kan uar; uar tak kan ni. Faina pawimawhzia te, a thatzia te, a nawmzia te hi kan hre bel hle tawh ang. A nihna takah chuan, faina hnatlang leh faina awareness campaign kan kalpui nasat tawh dan ngaihtuah hi chuan, faina chungchang la hre ve miah lo nausen piang hlim leh tlema leikang deuh chin, faina chungchang la varpawh chiah lo kum 3 mi vel te hi faina chungchang eng mah hre lovin lo seilian/puitling ta se, faina awareness campaign riva hre miah lo chung pawha faina rawn thanlenpui ve nghal vek thei tawh tur khawpa lo fai thianghlim thei tawh tura mawi kan ni; mahse, bul tan ang reng kan la ni si!
Kan lui bawlhhlawh dan atang hian faina hi kan ngai pawimawh tak tak lo tih a lang chiang hle. A huhova bawlhhlawh thenfai te hi chu kan ti mai zel; mi hmuh lohva kan khawih peih loh leh kan thawh peih loh turte pawh a huhova thawh a nih tawh chuan kan ham bawrh bawrh zel. Mahse, chu chu kan fai phah miau si lo.
Heti taka hnatlang uar te chu khawi lai laiah emaw te chuan kan fai phah ve bawk ang chu maw le, kan ti a ni maithei; a dik ang. Mahse, engatinge beihpui thlak meuha faina hnatlang hi tun thlenga kan la neih reng a, kan la bansan theih miah loh le? tih hi zawhna a ni.
Faina hnatlang…
