Karim Benzema chuan a club thar Al-Ittihad tana a inlan vawikhatnaah karliamta kartawp lam khan Arab Club Champions Cup-a Tunisian club Esperance an hnehna goal khungin, a team chu 2-1 hnehna a chanpui a, fans thlawpnaah lawmthu a sawi nghal.
Ballon d’Or dawngtu Benzema hian Saudi champion tana bul a tan ni hian second half-ah box pawn angle chep angreng tak atangin Al-Ittihad tana a goal hmasaber a thun a, inkhelh bana Saudi SSC television channel-in an kawmnaah Frenchman hian chuan match hautak zet a nih thu leh inbuatsaihna lama a thawhrim avangin bultanna tha a hlenchhuak tih a sawi a, zawi zawiin team ropui an dinchhuak dawn tih a tarlang tel.
Real Madrid-a kum 14 zet trophy chi hrang hrang a lakpui hnuah Benzema hian free agent ni chungin Al-Ittihad a zawm a; a bul tanna inkhela goal a thun tum khan a team-mate thar leh a chipui ni bawk N’golo Kant nen anmahni lawmtu fans chibai an buk a; stadium chhung boruak tarlang telin, “A huhang kha a makin a pui a, tan phat atanga hun tawp rat thlengin fans lamin team an fuihphur.
“Team dinhmun a tha a, min beisei dan level pha turin kan thawk chhunzawm dawn a, khati ang taka thlawpna dawng chung chuan thil ropui kan hlawhchhuak ngei ngei dawn a, fans chungah lawmthu ka sawi e.”
Fans thlawpnaah Benzema a lawm
