Aizawl Ramthar Venga awm St. Lawrence School chuan Zirtawpni khan Feast Day cum Parents Day an hmang a, Aizawl North-II bialtu MLA Dr Vanlalthlana’n a hmanpui.
Nu leh pate chu kan tun dinhmun atangin an fate chu an hma hun zel turah enge an thlen theih ang tih ngaihtuah turin MLA hian a chah. “Kan fate hi thil tha lo laka danglam ngam tura kan siam a pawimawh a, enge nih tir kan tum, kan tum chu engtin nge kan nih tir theih ang, chu’ng zawng zawng tihlawhtling thei tur chuan danglam ngamna a pawimawh a, huaisen taka ke pen thei tura kan fate kan fuiha kan zirtir a pawimawh a ni,” a ti.
St. Lawrence School zirlaite chu midangte tana malsawmna ni turte, hlawhchham chang awm mah se, beidawng loa, kan nihna kan dinhmun zahpui loa mahni infuih thar zel a, inringtawk turin a Dr Vanlalthlana hian a chah. Zirtirtute pawhin an zirlai enkawlte tana tha ber pe thei tura inbuatsaih a, miten engtinge an chanchin an sawi ang, tih ngaihtuah chunga an nitin hun hmang turin a fuih bawk.
St. Lawrence School hi kum 1992-a din a ni a, tunah hian staff 32 awmin nursery atanga class X theng a awm a, zirlai 732 an awm mek.
Fate nih tir tuma chiang turin MLA-in nu leh pa chah
