September thla te chu favang khua tih takah, boruak a dai a ni ngai a, rilru pawh a hahdam thin. Mizopa lunglen thla a ni a, an hun thlakhlelh pawh a ni. Kumin erawh a lum uap chuar mai a, lung pawh a leng hlei thei lo!
April hi Mizoram lum thla a ni a, May pawh a la lum. Khaw lum ber ni pawh April-ah a awm. Kuminah erawh September thla a la lum mauh mai a, kumina khaw lum ber ni pawh April-ah ni lovin September-ah a awm!
September thla-ah “ber thla” a intan a, khua a vawt deuh surh tawh tur a nih. Mahse September ni 22, Chawlhni liam ta kha kumina Aizawl lum ber ni a ni tlat!
Science & technology deptt enkawl State Meteorological Centre te’n an chhinchhiah danin, September ni 22-ah khan a vawh ber laiin 26°C a ni a, a lum ber laiin 33°C a ni. A hmain kuminah 33°C a la kai ngai lo. April ni 25, ni 27 leh ni 28-ahte khan 32°C a kai a, favang boruakah chu aia sang chu a kawk ta a ni!
Kumin September ni dang pawh a lum thei khawp mai a; ni 3, ni 6, ni 7, ni 8, ni 19, ni 20, ni 22, ni 23, ni 24-ahte khan 30°C a kai thin bawk.
Kuminah ruah a tam a, ruah a tam te chuan khua a vawt thin a ni ngai a, kumin erawh ruah tam kum a ni chungin khua a lum tlat! State Meteorological Centre enkawltute chuan environment chhe zelina a nghawng a nih thu an sawi.
September ni 22-ah khan lum leh vawt tehnaah a san bakah boruak hnawng tehna lam humidity-ah pawh a sang a, hei hi khua tilumtu a ni.
State Meteorological Centre-ah degree Celsius (°C) leh humidity te an chawkrual a, chuta a lan dan chuan khami khan mihringin lum an tih lam (real feel) chu 38°C daih a ni!
State Meteorological Centre enkawltute chuan kuminah ruah a tam a, ruah sur tur inup hi khaw lum chhan a ni tih an sawi a, ruah tui pai chhum vangin khua a uap chuar a, chuvang chuan khua hi a lum a ni an ti.
Favang khua a lum uap!
