Kum 10 dawn liam taa US-a a nupui a thah hnua tlan bo, kum 34 mi Indian pa, Bhadreshkumar Chetanbhai Patel chu Federal Bureau of Investigation (FBI) chuan an la zawng zel a. Gujarati pa hi 10 Most Wanted Fugitives-ah an telh.
Patel-a hian April, 2015 khan a nupui a that a. FBI chuan X-ah a awmna chin hria hnena hrilh tura ngenna an chhuah thar leh a, ‘ralthuam keng leh mi hlauhawm tak’ an ti.
“WANTED – ralthuam keng leh mi hlauhawm tak! FBI chuan Ten Most Wanted Fugitives zinga mi, Bhadreshkumar Chetanbhai Patel-a a la zawng zel a. Kum 34 mi hi a chin i hria a nih chuan a nupui rawng taka a thah avangin man duh a ni a, FBI-i lo bepawp dawn nia,” tiin an tar lang a ni.
FBI hian Patel-a man theihna atana a chin hrilh thei hnenah $2,50,000 zet an phal bawk.
Patel-a hi kum 2015-a Hanover, Maryland-a Dunkin’ Donuts-a an thawh laiin a nupui, Palak-i thata puh a ni a. Dawr pindan hnung lamah choka chem nen beiin vawi eng emaw zat a vit nia hriat a ni a. He thil hi zan lama hna an thawh lai niin anmahni dawrtute pawh an awm a, a che vel hi CCTV pawhin a la fuh a. Thlalakah chuan hetih laia kum 24 mi hi camera atanga an lan tawp chin hma chiahin a nupui nen hian chokaah hian an lut dun a ni.
A lakah hian tualthah thubuai, mi sawisak, ralthuam hlauhawm hmanga mi hliam thubuai eng emaw zat siam a ni a. April, 2015 khan manna tur thupek chhuah a ni a, man lohvin a la awm ta reng a ni.
Baltimore Field Office-a Special Agent in Charge Gordon B Johnson chuan, “Bhadreshkumar Patel-a hi rawng taka chea pawi a khaih avangin FBI Top Ten List-ah hian a chuang a ni,” a ti.
“Kan chhui mek zel a, vantlang puihna nen kan la man ngei kan inbeisei a. Kan la theihnghilh mai dawn lo va, kan hmuh hma chu kan chawl lo vang a, a awmna kan hria a, kan mana a laka dikna hlen chhuah ngei kan tum,” a ti.
FBI 10 Most Wanted Fugitives List-ah Indian pa tel
