Indian Super League (ISL) an chhunzawm thei tawh lo mai dawn nia a lan hnuah season thar tan turin AIFF a inbuatsaih mek a, an player leh staff-te hlawh pe chhunzawm ta lo club-te pawhin hlawh an pechhuak leh tan a, kawng hrang hrangin season thar atana inbuatsaihna an kalpui tan leh takna kawngah FC Goa pawhin an tlarhnung tinghet turin Mizo defender Jerry Lalrinzuala an senglut.
Season liamta (2024-25) khan Odisha FC tan Lalrinzuala hian match 19 khelin, pass tum 287 a nei a; mi ball chhuhsakah vawi 31 a hlawhtling a; chance vawi ruk a siamchhuak bawk.
A pumpuiin Odisha tan khan Lalrinzuala hian match 55-ah goal khat thunin, assist vawi hnih a nei tling.
ISL-a a team hmasaber Chennaiyin FC chu kum 2016 khan zawmin, a chetha nghal hle a; a debut season-ah tuna a vawn tak FC Goa lamah hian free-kick goal pui tak a chhuihlut.
Kha mi kum khan ISL Emerging Player of the Season award dawngin, India ram defender naupang zawkte zinga hmalam hun nei eng ber pawl a rawn ni chho hial a ni.
Chuti chu ni mah se I-League club DSK Shivajians chu rei vak lo loan-in a han zawm leh lawk a; tah pawh chuan Best Emerging Player award a dawng leh mai a!
A career-a hun ropui ber chu Chennaiyin FC tan 2017-18 ISL trophy a lakpui kha niin, kum 2023-ah Odisha FC a zawm a, kha mi atang khan left-back position lamah a khel chho ta a ni.
Goal thun lamah sawi tham nei lo mah se tlarhnung ven lamah chuan fak a hlawh ve thin a, rang taka a in recover leh heihna avang khan tlarhnung lama rin hlawh pawl a ni pha.
AIFF Elite Academy atanga Chennaiyin, East Bengal leh Odisha lama khel tawh full-back thawkrim Jerry hi ke veilam hmang thiam tak niin, a cool raih thin hi mite fak hlawhna pakhat a ni.
A club thar Gaurs hian September ni 17, Nilaini hian AFC Champions League Two group stage-ah Al Zawraa an hmachhawn dawn a, kum engemawzat ISL-a lo khawsa tawh Mizo defender tawnhriat ngah hi an chhawr nghal thei dawn a ni.
FC Goa defender thar Jerry Lalrinzuala
