FCI-in buhfai leh wheat
thla 4 vel daih a khawl
Mizorama Food Corporation of India kudam hrang hrangah June 20 khan buhfai metric tonne 24858 leh wheat metric tonne 996 stock a awm
FCI hotute sawi danin, furpui vanglaia mipuiin ei tur an tlakchhawm lohnan leh stock a awm reng theihnan Mizoramah rel hmangin buhfai leh wheat phurh mek a ni a. Hei hi Bairabi rail head (FSD Bualpui, Kolasib leh Bairabi) leh Sairang railhead (FSD Sairang, Aizawl, Lunglei leh Lawngtlai) kaltlangin a lo thleng thin.
Tunhnaiah hian rel hmangin June leh July 2026 chhunga buhfai lokal tur leh kal mek MT 20032 a awm a. Tun dinhmuna stock awm zat hi a thahnem tawk a, MT 24858 hian National Food Security Act (NFSA) leh welfare scheme dangte Mizoram pum mamawh thla 4 vel chhung daih thei tura ngaih a ni. Thla tin atana NFSA leh welfare scheme mamawh zat chu: buhfai MT 6209 leh wheat MT 123 a ni a. Stock awm mek leh ruahman sa lokal tur hi safety buffer norm aiin an thahnem zawk a ni.
FCI chuan Mizoram sawrkar tan mamawh aia tam mah pe thei turin open market sale scheme – domestic (OMSS-D) hnuaiah e-auction tel loa bufai a pek bakah June thla atan buhfai MT 3000 sem tura ruahman a ni tawh a, chumi tihlawhtling tur chuan rail rake dang MT 2600 chah belh tum a ni tih an sawi.
Ei leh bar lo luh dan hi nitin a thlithlai reng a, mipuiin eitur tha an ei theihnan a chhekkhawlna – storage facility pawh a tha thei ang berin a enkawl tih an sawi bawk.
FCI-in buhfai leh wheat thla 4 vel daih a khawl
