Mizorama buhfai ei tur chawluttu Food Corporation of India (FCI) in thuneitute hnena thil a dil pahnih chu kum a liam hnu ah pawh ala hlawhtling lo ve ve a. Sairanga buhfai dahkhawlna tur kudam an sak mek pawh ‘stay’ sak an ni.
FCI State Consultative Meeting chu Ningani khan an chairman, Rajya Sabha MP K Vanlalvena hoin an thukhawm a. Hemi hnua thuthar thehdarhtute nen an inkawmnaah Bairabi rel station-a wagon atanga buhfai unload-na platform chung nei lo atanga truck-a an load lehnaah harsatna an tawk a, a panna kawng a la tha lo bawk a, a thuneitu Railways lamah chinfel sak tura an ngen chungin, tun thlengin tih hlawhtlin a la ni lo tih chairman hian a sawi.
Rel din theih hun pangngaiah unload zawh hman a nih thin loh avangin an din belhna man FCI-in a chawi a, cheng nuai tam tak an chawi phah reng tih sawiin, sum an hmuhna a nih avangin a chinfel sak hi Railways hian an tum lo em ni, a tih theih hial thu a sawi a ni.
Sairang thlenga rel luhtir tum meknaah, Bairabi rel station-a an buaina ang hi an tawh loh nan hma an la mek tih a sawi bawk.
Sairanga FCI kudam tur ram an neihah kudam an sa mek a, zaa 60 an zawh tawh hnu ah Environment Forest & CC department atangin Reverine Reserve Forest huamchhung a ni, tiin, sa chhunzawm lo tura tihna an dawng tih K Vanlalvena hian a sawi a. State sawrkar nen chinfel tuma hma lak mek a ni tih a sawi.
“Forest lam hi dem ngawt theih an ni bik lo a, forest clearance kan lo dil lo miau a ni. Amaherawhchu RRF chin hre tur hian hriattirna inziak a awm loh avangin, khawi chin nge tih mipui nawlpui pawhin kan hre mang tlat lo. RRF hian Sairang bakah Hortoki ram chhung zawng zawng pawh a lo huam a ni,” a ti.
FCI hian Aizawlah anmahni pual office tur MINECO ramah ‘plot’ an dil a. Sawrkar hmasaah tihfel theih mai tura sawi hmuh an nih laiin an hlawhtling lo. Tunah an dil tha leh mek tih FCI hotute chuan an sawi.
Nikum atanga Manipur-a tualchhung buaina a awm hnu ah FCI hian Mizoram atangin Churachandpur district-a Zofate tan buhfai a chawkluh sak thin. “Thla khatah metric tonne 1500 vel an mamawh anga ngaih a ni a, nikum June atang khan Bairabi atangin Mizoram quota lo lut hi kan pe char char a ni,” FCI hotu pakhat chuan a ti. Churachandpur panna lam, Mizoram china kawngpui tha lo chi driver-ten hrehawm an ti a, nikumah driver pakhat chesualin a nunna a chan phah bawk nen, PWD-in siamsak thei se an duh hle tih a sawi.
8 Tunah hian FCI chuan furpui lai, June – August atan Mizoram sawrkar hnenah buhfai metric ton 15261.537 a pe fel tawh a; la lak loh, lak tura tihfel tawh MT 16439.499 a awm bawk.
8 Aizawl kudam-ah MT 1072.233, Lunglei kudam-ah MT 2163.442, Lawngtlai kudam-ah MT 2354.766, Bairabi kudam-ah MT 3433.415, Kolasib kudam-ah MT 2371.693, Bualpui kudamah MT 3865.988 dah a ni.
8 Kudam-a thlen tawh leh Mizoram chhunga luhpui tawh zawng zawng hi quintal 175590 a awm a ni.
8 Sairanga kudam-ah hian buhfai quintal nuai 1 leng tura ruahman a ni a, a bak quintal 20000- 30000 inkar la len belh theia ngaih a ni.
8 Khawzawlah FCI kudam thar tur sak mek a ni a, kum 90 chhung vel atana ram hi hawh niin, a chhak lam leimin hnathawh a ti khaihlak deuh naa, sak zawh thuai beisei a ni.
8 Sairang leh Khawzawl kudam hi hman theih a nih hun chuan Mizoramin FCI atanga a lei thin atanga chhut chuan, thla 8-9 chhung vel tla chhek khawl theih beisei a ni.