FCS&CA order chhuah cancel leh
Food Civil Supplies & Consumer Affairs-in February 4-a office order a tihchhuah, e-KYC (Know Your Customer) ti lo te chu ration card atanga an hming paih tur a ni tih chungchang chu order chhuah ni la la hian hnuhlet leh a ni.
Order tihchhuah, cancel leh taka tarlan a nih danin, Supreme Court thupek bawhzuiin sawrkar laipuia Food & Public Distribution chuan state sawrkar-te chu NFSA (National Food Security Act) hnuaia befneficiary-te e-KYC ti turin hriattirna a chhuah a. Hemi chungchangah hian DCSO-ten mahni biala NFSA beneficiary zawng zawng, ration card-a an hming chuang tawh phawt chu an ration card neihna retailer theuhah biometric authentication (fingerprint) tih tir turin a ti a ni.
Office order-a tarlan danin, e-KYC hi 2025 February 28 hma ngeia zawh hman turin a ti a. Sawrkar laipui thuchhuak angin e-KYC ti ve lo beneficiary-te chu ration card atanga an hming paih an ni ang, tih a ni.
February 4 vek khan he order chhuahtu FCS&CA director hian hnukkirin, khawl lam inpeihfel lohna a la awm avangin thu leh awm hma chu e-KYC chungchang hi cancel a ni tih a sawi.
Hemi chungchangah hian MNF Legal Board hruaituten Nilainia thuthar thehdarhtute an kawmnaah FCS&CA department-in chhungtin phek buai ngai ration card-a e-KYC ti vek tur leh February 28 ralhmaa ti hman lote chu ration card atanga paih vek turin mipui a vau tih a sawi.
Ration card-a awm tur chhungkaw member zawng zawng, mahni ngei kala Aadhaar number chhutluh bakah fingerprint hmeh vek tur tih chu, VC leh LC inthlan buai nen, kumtawp exam lai ni bawk nen, zirlai nei chhungkua zawng zawng leh inthlan buaipuitute tan phurrit nasa tak leh invauna order siam a ni chu vanduai thlak an tih thu sawiin, a tlem thei ang berin vote thlak se tih duhna a ni em tih hial ngaihtuah theih a ni tih an sawi.
FCS&CA order chhuah cancel leh
