Fernerbahce-ah Fred

Brazil midfielder Fred chuan Manchester United chhuahsanin Turkish club lian Fernerbahce a zawm fel.
Fred hian kum 2018 khan Shakhtar Donetsk atangin EPL club lian Manchester United hi a zawm a. Red Devils hian Fred manah £47m zet an seng. Khawvela club ropui zinga mi United a zawm thei hi a lawmin nuam a ti hle a, a suangtuah ram thleng dikna ni hialin a sawi. Old Trafford-ah kum nga ngawt hun a hman chhungin EPL-ah vawi 139 a khel a, goal riat a thun bakah assist vawi sarih a nei hman. United tan hian inelna hrang hrangah vawi 213 lai a khel a, goal 14 a thun.
United chhuahsan a, Fernerbahce a zawm dawn tih a chian hnuin, “Ka career-a ka par vul lai ber chu a lo chuai thenin, ka hun tawn ropui ber pakhat chu a tawp ta. Khawvel club ropui jersey ha a, an tana khelh ka chak ngawih ngawih thin a, United hi ka duh aisam hlawhtlinna a ni. Kum nga chhung hun kan hman kha kei leh ka chhungkaw tan mang phan ram ataka lo thleng dik chu a ni. Englai pawhin… Reds..” tiin a club hlui ni ta United a ngaihhlut zia social media-ah a tarlang.
United thlahna thu a sawi hnuin a club thar tur chungchang a sawi zui leh zat a. “Fernerbahce hi Turkish club ropui, hnuhma ropui tak lo hnutchhiah tawh an ni a. Hnuhma ropui dang hnutchhiah belh turin thah ka thawh ve thei tur hi ka lawm a, bul tan hun ka nghakhlel tawh tak zet a ni”, a ti.
Kum 30 mi Fred hian United manager Erik ten Hag ruahmannaah hmun pawimawh a chang phak tawh lo va, atan chhuah a finthlak tawh zawk. EPL club Fulham in lak tumin ngaihven bawk mah se Fernerbahce a thlang ta zawk. Turkish club lian hian Fred manah 10m euros (£8.62m) an pe phawt ang a, a khelh that dan a zirin 5m euros (£4.31m) an pek belh zui leh ang.