Ferrari home race hnehtu Leclerc

Ferrari home race hnehtu Leclerc
Pathianni Italian F1 Grand Prix-ah Italy leilunga inbun Ferrari-in an home race-ah hlawhtlinna an chang a, Monza khuaa Autodromo Nazionale Monza tlankawngah an driver Charles Leclerc chu pakhatna niin, season kal laia lawmman semna dawhsan chungnungber a lawn vawihnihna a ni.
Leclerc hian McLaren one-two finish tura beiseiawm a tihthuanawpsak a, a hnungah British team driver pahnih Oscar Piastri leh Lando Norris an thleng indawt.
Australian Piastri hian pole position atanga tlanchhuak a team-mate Briton Norris chu opening lap-ah lehpel nghal mah se Ferrari driver lakah a hmahruaina a hum tluanchhuak zo lo a, runner-up niin, driver standing-a pahnihna luah chunga title beisei ve mek Norris chu pathumna a ni.
Norris hian championship standing-ah pahnihna luahin hmahruaitu Red Bull driver Max Verstappen lakah point 62-in a la hniam a, intlansiak tan hma khan point 70 laiin a thlau thung.
Pathianni Monza intlansiaka parukna daih luahtu Dutchman Verstappen hian season kal laia race vawiriat la awmah a hmahruaina a humhim zo dawn em tih hi tun dinhmunah sawilawk mai theih a ni lo!
Italy international forward hlui Alessandro Del Piero ngei khan Monza tlankawngah chequered flag a lo vai lauh lauh a, chu flag ze tial ruan mai a tlanpelh laiin car radio-ah hnehna changtu Leclerc chu “Mamma Mia, Mamma Mia,” tiin a auchhuak thawt thawt a, a hnua an kawmnaah a result hlawhchhuah chu a a wih loh hial zawk thu sawi chungin kumtin mai hian Monza leh a home race Monaco-a hnehna chan ngei ngei a duh thin thu sawiin, he race pahniha chak chu a tan a special hliah hliah bik tih a tarlang tel.
McLaren chuan Italy tlankawngah khan constructors’ championship-a hmahruai theihna hun tha bawhpelh mah se race hma chiaha point 30-a an phak loh hmahruaitu Red Bull nena an inthlauhna chu point riat chiah a ni ta.
Monza tlankawngah Ferrari driver dang Carlos Sainz chu palina niin, Italian team future driver Lewis Hamilton chuan a chhuahsan mai tawh tur Mercedes car chu panganaah a thlenpui thung.
Mercedes driver pakhat zawk George Russell chu pasarihna niin, pariatnaah Red Bull star Sergio Perez a thleng a, Alex Albon chuan pakuana luahin Williams tan point hlu tak a thawkchhuak a; chetsualna thlentu nih manah 10 second penalty hmu mah se Kevin Magnussen chuan 10-na luahin point hnuhnungber a thawkchhuak ve hram bawk.