MNF Thalai president Robert Romawia Royte MLA chu AMC Play Ground Brigade Field enho puiah ZPM Thalai chuan an sawm a. Robert Romawia hian field bakah SASCI sum lapse dan enho nghal turin Fact Finding Mission din ho puiah a sawm let.
ZPM Thalai Hqrs. thuchhuak chuan, tunhnaiah MNF Thalai president hian press conference a neihah AMC Play Ground Brigade field ah sum hmanna dik lo a awm lo anga a sawina chu veng mipui leh thalai infiammite zah lohnaah a ngai tih a sawi a. MNF MLA hian a hman hun leh ni ZPM Thalai hriatttir se, ama ho ngeia Bridage field siam dan enpuiah an sawm tih a sawi a ni.
Hei hi MLA Robert Romawia Royte hian a social media account atangin a chhanglet a. ZPM Thalai-in Bawngkawna AMC Sports Complex-a AMC hnathawh dan enho puia an sawm a lawm hle tih sawiin, an pute ho rin ang leh an insawi ang an nih loh zia an hriat a, huai taka khalh ngil tura hma an lak theihnan ‘ZPM Thalai + RRR Fact Finding Mission’ din hial tha a ti tih thu a sawi.
ZPM Thalai sawmna chu a thil ngen hi an pawm theih chuan an sawmna hi lawm takin a pawm tih sawiin, AMC hnathawh – AMC Sports Complex,Bawngkawn enho; SASCI Part-I 2025-26 hnuaia Mizoram tana sum dahhran sa lapse dan Department of Expenditure, Ministry of Finance New Delhi-ah ZPM Thalai nen a huhoa zuk enho; SASCI 2025-26 Part-I sum 34% (nuai 11152) lapse-in a khawihbuai mek Aizawl chhunga SASCI project 20 a hmuna kala enho turin a sawm tih a sawi.
‘Ruling party thalai rual tha thulha an thawk chhuak law law a nih chuan, a chunga pathum khi thil hrechiang turin tlawhho /enho ngei ka rawt a. ZPM Thalai-in an pawm chuan ka zin programme pawh ka titawi mai ang,’ Robert Romawia hian a ti.
Field enpuiah Robert Romawia sawm Fact Finding Mission dinpuiah sawm let
