Fifa Best men’s player of the year
Vinicius Junior
Doha khawpuia Fifa Best Awards semchhuah takah Real Madrid leh Brazil winger Vinicius Jr chuan Fifa Best men’s player of the year trophy a dawng a, tun hi Fifa Best award a hlawhchhuah tumkhatna a ni.
Kum 24-a upa Brazilian mihang hi football khelmual chhung leh pawn lam thlenga a vun han vanga diriamna leh hmuhsitna tawk nasa leh langsar berte zinga mi niin, kumina Ballon d’Or chawimaiwna pawh kha a dawn tura ngaihna a len hle laiin Manchester City Rodri chanpulah a lut a, kha vang khan Real Madrid lungawi lo chuan Ballon d’Or ceremony pawh an boycott phah hial a, coach tha ber lawmman dawngtu Carlo Ancelotti pawhin a hmunah a award dawn a la lo nghe nghe!
Doha khawpuia Fifa award sem inkhawmah erawh 2023-24 season-a goal 24 thuna assist tum 11 zet nei tling, Bernabeu club-in Champions League leh La Liga title an lak theihna kawnga thawhhlawk berte zinga mi Vinicius Jr chuan a phu ang ngeiin Fifa mimal chawimawina sangber a dawng ve ta nge nge a, October thla Ballon d’Or boycott boruak nen chuan a dan a dang ta!
A hun tawn chu ropui leh mak a tih thu Vinicius chuan sawichhuakin, “Sao Goncalo kawtthlera ke lawnga ball ka pet lai ngaihtuahin he hmuna ka ding thei hi a awihawm loh hial zawk a ni,” a ti.
Ballon d’Or leh Fifa Best Awards hi football-a chawimawina ngaihhlut hlawh ber ber pahnih niin, tun hi Vinicius kuta Fifa prize a luh vawikhatna a ni a; award hnuhnung pahnih kha Lionel Messi chanpual niin, chu mi hma leh chuan Robert Lewandowski kuta hlan a ni.
He award dawng tura tehfung an khai hun chhung chu August 2023 atanga August 2024 inkar niin, vote thlaktute hi an inpawlhsawp nuk a, Fifa member ram tina journalist pakhat theuhte bakah national team captain leh manager theuhte an ni.
Vinicius Jr khelhna Real Madrid chu Fifa award sem chhuahna Qatar ramah hian Nilaini Fifa Intercontinental Cup final-a Mexican club Pachuca hmachhawn tur an nih avangin an awmsa reng reng a, Doha khawpuia Lusail Stadium hnaihah an thleng a, award sem inkhawmah pawh kokim zawkin an player lawmman dawng lai an tawiawm thei!
Fifa Best men’s player of the year thlannaah hian Spain tana Euro 2024 title hawntu midfielder Rodri chu pahnihna niin, Ballon d’Or sem laia sawihlawh taka a hmakhalh Vinicius-a hnungah a awm ve ta thung a; pathumna chu Real Madrid English player Jude Bellingham a ni.
Fifa lam chuan award a semchhuah rualin coach leh captain theuhte’n tute nge an vote tih an tarchhuak nghal a; England skipper Harry Kane chuan international team-mate Bellingham chungah Rodri dahin, pathumnaah Vinicius a dah thung.
Three Lions’ interim boss Lee Carsley ve thung chuan a chung berah Bellingham dahin, a hnuaiah Rodri leh Barcelona rawlthar star Lamine Yamal a tlar thla.
Scotland boss Steve Clarke leh Wales manager Craig Bellamy-te pawhin Kane ang bawkin Rodri chu top-ah an thlang ve ve.
Wales captain Aaron Ramsey chuan Vinicius a dahsang ber a; Northern Ireland captain Paddy McNair pawhin Rodri duhsak berin, Great Britain chhunga mite hian England midfielder Bellingham an duhsak teh huam lo tlat!
Brazil captain leh manager-te chuan an chipui Vinicius an vote mai a, hetih lai hian Spanish captain leh manager-te thung chuan Rodri aiin Real Madrid right-back Dani Carvajal an duhsak ve ve.
Men’s team of the year-ah Premier League player panga langin, Real Madrid bik chauhin tuna football khelh zawlhsan tawh Toni Kroos telin player panga bawk an thawh a, an elpui lian Barcelona atangin pakhat a lang ve bawk!
Team khat daih tura an thlanchhuahte chu – Emiliano Martinez (Aston Villa), Ruben Dias (Manchester City), William Saliba (Arsenal), Dani Carvajal, Antonio Rudiger, Jude Bellingham, Kroos (all Real Madrid), Rodri, Erling Haaland (both Man City), Lamine Yamal (Barcelona) leh Vinicius Jr (Real Madrid)-te an ni.
Copa America-a Argentina champion-puitu Martinez chu goalkeeper of the year atan thlan niin, kum 32 mi hian Ballon d’Or and Fifa Best awards sem inkhawmah tum hnih ve ve best goalkeeper award a dawng ta a ni.
Fifa Best men’s player of the year Vinicius Junior
