Fifa Best women’s player of the year
Aitana Bonmati
Barcelona midfielder Aitana Bonmati chu women’s player of the year award dawngtu a ni leh ta a, kum hmasa nen kum zawnin Fifa hnuaia hmeichhe mimal chawimawina ngaihlut hlawh ber a hui.
A club career-a Catalan team bak vawn la nei lo Bonmati hi kum 26 mi niin, Fifa Best Awards semnaa kum hnih a dinchhuah zawn theihna chhan hi 2023 Women’s World Cup-a Spain team a champion-pui rah chhuah niin, kha tournament-ah pawh khan best player lawmman Golden Ball award a lo dawng tawh bawk.
Spaniard hi nikum leh kumin women’s Ballon d’Or semnaah pawh khan award dawngtu ni tawhin, Champions League-a Barcelona a champion zawnpui vanga award hi dawng awn awn a ni.
Bonmati chuan a award dawn chu a chhuang tih sawi chungin a hlim hle tih a sawi a, chutih rualin, a mimal theihna rahchhuah a nih loh thu leh team thawhhonain a hrinchhuah niin a sawi a, engkim hnehtu Barca leh national team-a a khelhpuite puihna vang a nih thu a sawi phal!
Season liamta khan Bonmati hian club level-a trophy awm thei zawng zawng a hui fai leng a; Barcelona chu history siampuiin Liga F, Champions League, Supercopa leh Copa de la Reina title a lakpui vek maw le!
Inelna lian paliah belhkhawmin goal 19 a thun tling a, hmeichhe award thlannaah Zambia striker Barbra Banda leh a club team-mate Caroline Graham Hansen-te a hmakhalh a ni.
Mipa lama Real Madrid an chungnung ang bawkin Best Fifa women’s XI chu Barcelona leh Spain player-te’n an al hneh hle a; England defender Lucy Bronze pawh hmeichhe team thlanchhuah zingah hian hmuh tur a awm.
Hmeichhe Best XI
Alyssa Naeher (Chicago & USA); Lucy Bronze (Chelsea & England), Irene Paredes (Barcelona & Spain), Naomi Girma (San Diego & USA), Ona Batlle (Barcelona & Spain); Aitana Bonmati (Barcelona & Spain), Lindsey Horan (Lyon & USA), Gabi Portilho (Corinthians & Brazil), Patri Guijarro (Barcelona & Spain); Caroline Graham Hansen (Barcelona & Norway), Salma Paralluelo (Barcelona & Spain)