Nakkuma Fifa president thar thlan tur chuan boruak a nei lian chho zel a, president hmingchhe chho tak Gianni Infantino hi an zuam deuh nge ni dawn chuh tum hming kan hriat belh mek a, chutih karah chuan candidate buk rit pawl ni tura sawirik zinga mi leh Fifa head of global development nihna chelh rei tawh fu Arsene Wenger chuan inthlan chuh a tum loh thu a sawi chiang.
Arsenal manager hlui Wenger-a’n presidential election-a Infantino khin a tum loh thu hi BBC Sport chuan tarlangin, klarliamta Inrinni mai khan French newspaper L’Equipe pawhin Wenger-a’n a pu ep zawnga in candidate a tum loh thu hi an ziak ve bawk.
Frenchman Wenger hi football khawvela pa langsar berte zinga mi niin, Infantino khing pha deuh ber tura rinkaite pawh a nih laia chuh a tum loh thu hi a term lina atana president nih leh tum mek Infantino tan chuan thawk huaina tham a tling awm e!
Fifa huang chhunga chanvo neite zinga Infantino dodaltute zinga a hming tarlan loh pakhatin BBC Sport a hrilh danin, Swiss Infantino khing zo ber tura ngaihin a kawi-a-ngila a thu a zawm thin Infantino ep zawnga inthlan a chuh ngam lo chu zahpuiawm an tih thu a sawi!
“Candidate duhthusam a ni chiah lo a nih pawhin khawvel hmun tam tak mar dek ve pha tur a ni asin maw le…” a ti vawng vawng!
Tarlan tawh angin, kum 77 mi Arsene Wenger hi Uefa bakah khawvel football-a pawl hraw tak tak dangte pawhin paihthlak an duh ngawih ngawih Infantino khing tura an vauchher ber a ni hman a, mahse, dinhmun pawimawh taka hung chhuaktu a pu chu a phatsan ngam tlat lo a, French President Emmanuel Macron ngei pawhin a thlem hlawhchham niin an sawi!
Private investor-te kuta World Cup hlan tumna FIFA Forward Enterprise an tih sawiseltu langsar zingah Wenger ngei pawh hi a tel ve zuk zuk hman kha a ni a, mahse, a saseh tak takah chuan Infantino uicho rinawm a nihna a lantir nia ngaih a ni!
Infantino hi South America, Africa leh Asia lamin an thlawp niin sawi a awm a, amah pawhin khawvel football-ah thlawpna a la nei tha tawk niin a sawi bawk.
Vawiin, November 18 nomination deadline liam hma ngei hian Uefa-in tunge an vawrhchhuah dawn tih an chian hman a ngaih tawh avangin Wenger-a chipui tho French Football Federation (FFF) president Philippe Diallo lam an hawi zui ta a ni.
Diallo hian a bo-a-bang awm loin Uefa executive committee member-te thlawp a hlawh a, nizan khan FFF lam pawhin dan ang takin an chhawpchhuak tura ngaih a ni.
October thla daih tawh khan Tottenham defender hlui Ramon Vega pawhin Infantino khin a tum thu hi puang tawhin, ani hi president chuh tura thutlukna siam kan hriat hmasakber a ni nghe nghe.
Japan Football Association honorary president Kozo Tashima pawhin 2027 FIFA presidential election chuh a duh thu a sawi tawh a, vawiin hian nomination a file tak tak dawn em kan thlir ang.
President election candidate-a pawm ni tur chuan a tlem berah national association panga tal thlawpna hmuh a ngai a, hei hi March 18, 2027-a Fifa presidential election chuh tum hming kan han tarlan takte hian an tlin dawn em hriat a la ni chiah lo.
Fifa chief nih tum lo Wenger Chuh tum an lawr tuam tuam!

