Fifa Club World Cup khel tur Inter Miami

Footballer ropui Lionel Messi khelhna Inter Miami chu Fifa Club World Cup 2025 khel turin thlan an ni.
Kum 2025 atangin Fifa Club World Cup hi tihlen a ni dawn a, club 32 ten inelna an hmachhawn tawh dawn. Asia khawmual leh Europe khawmual atangin club 12 ve ve an tel thei dawn a. Europe atanga tel tur hian Real Madrid, Bayern Munich, Paris St-Germain, Inter Milan, Porto leh Benfica te an tling chiang tawh a. Club parukin an belh ve leh ang. South America khawmual atangin team 6 an tel ang a, Africa leh North America leh Oceania atanga team teal an awm bakah a thlengtu ram atangin team khat tel tura thlan an ni dawn bawk. Fifa Club World Cup 2025 hi USA in a thlen dawn vangin Inter Miami hi inelna hmachhawn turin thlan an ni. Fifa Club World Cup 2025 a intum turte hi December 2024-ah draw neih fel a ni ang.
Fifa Club World Cup 2025 hmachhawn tura thlan Inter Miami hian Major League Soccer-ah an season tha ber an hmang mek a, khelh 34 atanga point 74 hmuin table-ah hma an hruai mek. Inter Miami hian inrinni a an khingpui New England Revolution chu 6-2 ngawtin an hneh a, he inkhelah hian Lionel Messi chuan hattrick a siam nghe nghe. Season hmang tha tak Inter Miami hian MLS Supporters Shield an dawng nghe nghe.