Fifa ranking thar ber:
Kum 9 chhunga India hniam ber tum!
Tunhnaia Fifa ranking thar tarchhuahah Indian men’s football team chu an luah mek atanga pen ruk lawiha tlahniamin kum kaw chhunga an hniam ber tum an tawngbua a, 133-na an ni dawrh tawh!
He mi hma chiaha Indian team ranking hniam ber tum chu December 2016-a world number 135-na an luah kha niin, India ranking that ber hun lai chu February 1996 daih tawha 94-na an thut kha a ni.
Karliamtaa Fifa chart thar phochhuahah June thlaa an dinhmun atangin step rukin an hniam tih tarlan a ni tawh a, a hniam zawnga an kal chhan hi June thlaa tum hnih ngawt an tlawm vang kha a ni.
June ni 4 international friendly-ah khan Thailand lakah sihnih faiin India a tlawm a; a hnuah Fifa ranking-a an aia hniam ve lehchhawng Hong Kong chu Asian Cup qualifying round match-ah sikhat faiin an hneh lo leh a, All India Football Federation (AIFF) lamin an head coach chhawr lai Manolo Marquez an ban phah ta nghe nghe a ni.
Ranking thar bera Indian team rating point hi 1113.22 niin, a hma chiah khan 1132.03 a ni a; Fifa rankinga Asia khawmualpui ram lang 46 zingah 24-na niin, Asian zinga ranking nei sang ber chu Japan (17th rank) an ni.
Hun engemawti atang tawh khan Indian men’s team kechheh hi a fuh hlei thei tlat lo a; coach bang ta Marquez-a hnuaia match an khelh hnuhnung vawi riatah Blue Tigers kha vawi khat chiah an chak a, chu chu kumin March thlaa thenawm hnaivai Maldives an hneh kha a ni.
Kumin hian game li khel tling tawhin, tah chuan vawi khat an chak tih loh chu dawr vawi hnih leh tlawm vawi hnih an nei a; an hneh ve mai tura ngaih zinga mi Hong Kong lehzel laka an tlawm hnu phei kha chuan India tan 2027 Asian Cup khelh phak chu a khirh talh tawh a ni.
Result chhia indawt chho zut avang khan ram tana inkhelh chawlhsan tawh Sunil Chhetri-te han kokir leh bawk mah se eng ual an ang thei chuang rih lo!
India international match khelh leh tur hnaivai ber chu October thla Asian Cup qualifiers third round-a Singapore an hmachhawn tur hi a ni.
Fifa ranking tharah hian ram 210 tlar chhuah zinga hmahruaitu chu world champion Argentina leh bawk la niin, an hnuaiah hian Spain, France, England, Brazil, Portugal, the Netherlands, Belgium, Germany leh Croatia-te an indawt thla.
Fifa ranking thar ber:Kum 9 chhunga India hniam ber tum!
