Kum 2018 hnu lama a vawikhatna atan Ningania Fifa ranking thar tarchhuahah Indian men’s football team chuan number 100 hnuai lam an luah leh ta a, SAFF Championship trophy an lak leh hnuah pen khata hma sawnin 99-na an luah.
Tunthla tir lam Bengaluru khawpuia SAFF Championships semi-final (Lebanon) leh final (Kuwait)-ah khan penalty shoot-out kaltlang ve vein team khawng ve tak pahnih an hneh a, kha result pahnih khan India hmasawnna hi a thlentir.
Lebanon pawhin pen hniha hma sawn ve bawkin, India chung chiahah 100-na an thut a; Kuwait pawh step li laia kaisangin 137-naah hmuh tur an awm.
West Asian ram pahnih Lebanon leh Kuwait kha Asia chhim lam ram intelkhawm pawlah tel lo mah tournametn ti-hmuhnawm leh tikhauh zawk tura SAFF Cham-pionship khel tura SAFF pawn lam ram an sawmte an ni.
Tarlan tawh thin angin, kha tournament-a record nei tha ber India chuan fianl-a Kuwait hnehin a vawikuana ata SAFF Championship title an humhim a, Fifa ranking tharah 100 hnuai lam an luah zui ta bawk.
FIFA ranking-a India tawn san ber tum chu kum 1996 daih tawha 94-na an hawlh kha niin, kum 1993-ah 99-na an lo luah tawh a, kum 2017 leh 2018-ah 96-na niin, thla hmasa khan 100-naah an thu a, tunah 100 hnuai an luah.
A pumpuiah world champion Argentina chuan hmun chungnung ber luah chhunzawmin, an hnuaiah France, Brazil, England leh Belgium-te’n a sang panga (top 5) an luah khat.
Asia khawmualpui bikah Japan chu Fifa ranking-a sang ber ni lehin, Blue Samurai hi 20-naah an awm a; Iran (22), Australia (27), South Korea (28) leh Saudi Arabia (54)-te chu Asia khawmual-puia top five luahtu dangte an ni.
FIFA ranking tharah Indian 99-na
