FIFA World Cup Final halftime-ah a vawi khat nan show puitham takin an buatsaih dawn a, he show-ah hian Shakira, Madonna leh BTS te an inlan dawn tih an lo puang lawk tawh a, tunah chuan Justin Bieber pawh a inlan dawn tih an puang leh ta. Bieber pawhin he tournament USA, Canada leh Mexico ten an inthlentawm mek hi khawvel hnuk khawmtu a nih thu puangin, “Hetiang khawpa khawvel pawt khawm thei thil dang hi a awm lo,” a ti.
FIFA World Cup final hi July ni 19 hian Metlife Stadium, New Jersey-ah khelh a ni dawn a, Super Bowl halftime show zul zuin, a aia ropui zawk mah turin World Cup final halftime show hi buatsaih an tum a, FIFA hian Global Citizen Education Fund support nana a tih niin, khawvel hmun hrang hranga naupang ten football pet leh lehkha zirna tha zawk an neih theihna tura hmalakna a ni.
Justin Bieber chuan thuchhuah siamin, “FIFA World Cup ang tluka khawvel pawt khawm thei thildang a awm lo. He halftime show a peng pakhat ka ni ve tur hi lawmawm ka ti a, khawvel hmun hrang hranga naupang ten zirna tha zawk an dawn theihna tur hmalakna a ni tih hriat te hian a tiropui lehzual a ni,” a ti.
FIFA President Gianni Infantino pawhin thuchhuah siamin, “Artist ropui chungchuang Justin Bieber leh Coldplay ten min tawiawm thei tur hi ropui kan ti a. Madonna, Shakira, BTS, Burna Boy, Gustavo Dudamel leh PS 22 Chorus te pawhin khawvel mipui tluklehdingawn te inremna leh inpumkhatna tura tlangaunaah hian role pawimawh an chang dawn bawk a ni,” a ti.
FIFA World Cup Final Halftime Show inlan turah Justin Bieber an telh
