FIFA World Cup zawha France boss ni tur
Zinedine Zidane?
Kan hma lawk nipui thawt laia 2026 FIFA World Cup hi han zo fel se kum 14 zet hnua chawl ve tawh tur Didier Deschamps hmunruak luahin Zinedine Zidane chu France head coach a nih chhoh zui mai rinna a lian mek.
Real Madrid manager nihna tum hnih chelha lo chelh tawh French football legend Zidane leh national team inkar thu hi official-a puanzar leh tihchian engmah a la awm lo a, report hrang hrang darh chho mek zinga pakhatah chuan France national team coach ni tur hian tawngka chuan France midfielder hlui leh French Football Federation (FFF) lamin inremna an peih fel tawh a, FFF president Philippe Diallo chuan a hming tarlang lo mah se kumin world cup zawh ruala bang ve tawh tur Deschamps-a hmunruak luahtu tur chu an hmu tawh tih a lo sawi ve mawk bawk!
Diallo chuan French newspaper pakhat Le Figaro-in Zidane an ruai dawn em tih zawhna a chhan tumin an head coach thar tur chu a hming pawh a hriat tawh thu sawi chungin world cup zawh boss thar lakluhnaa tel ve ngei turin a sawm zui nghal zat!
Diallo chuan, “France team hi khawvela team tha berte zinga mi kan ni a, he team enkawl tur hi chuan quality nei chhah tak a ngai hrim hrim a, French mipui thlawpna hmu tha ngei tur mi an ngai bawk,” tiin an head coach thar tur chungchang a sawi a, a hming malman erawh chuan Zidane a nih leh nih loh lam a la sawi duh bik rih lo!
Diallo hian French coach panga tling lo hnen atanga manager hna dilna an dawn thu a tarlang tel bawk.
Tun dinhmuna an tinzawn tak ber Zidane hi FIFA World Cup 1998 leh UEFA Euro 2000-a champion team zingah khan France squad-a player pawimawh leh langsar ni ve vein, football a chawlhsan hnuah coaching a luhchilh a; Real Madrid chu January 2016 atanga May 2018 leh March 2019 atanga May 2021 chhung khan tum hnih enkawlin a lo enkawl tawh a ni.
Kum 2018 hnu lama world cup trophy la hawn leh ta lo French football team hi kumin world cup atan Group I team pakhat an ni a, Senegal leh Norway bakah Inter-Confederation Playoff Path B atangin Iraq, Bolivia leh Suriname-te zinga a tu emaw berin an la belhchhah leh ang.
FIFA World Cup zawha France boss ni tur Zinedine Zidane?
