Filling station leh gas agency endik
Lunglei district-a tuialhthei (petroleum, oil & lubricants – POL) leh eirawngbawlna gas (LPG) a harsatna a awm lohnan bawrhsap Navneet Mann kaihhruaiin Flying Squad chuan Lunglei khawpui chhunga filling station leh gas agency chu Thawhlehni khan a hmunah an endik.
Flying Squad hi sub- deputy commissioner H Lalthlengliana’n a hoa, SDPO, Supply inspector, Legal Metrology inspector leh DO (DM&R) an thawk chhuak. Filling station pathum leh gas agency pahnih tlawhin, tuialhthei leh gas chhek khawl sa dinhmun, mipui tana an pek chhuah dan an endik a. POL leh LPG chhek khawl sa a thahnem thawkhatin, a thlenna lamah pawh harsatna a awm lo tih hmuh a ni. Mipui hnenah tluang taka sem chhuah niin, chhek khawl sa bak pawh a thlen belh zel beisei a ni tih sawi a ni.
Gas agency-te hian tunhnaia mipui harsatna tawh tam ber chu online-a LPG book kawngah a ni tih an sawi a. Consumer-ten miss call-na tur number-a an call hnuah delivery authentication code (DAC) an dawn theih loh avangte, call a tlang theih loh avang leh gas agency-ten system-ah an lo khawih ve ngai a awm thin avangin gas book tumten harsatna an tawk thin tih an sawi a. Gas book chungchanga harsatna nei leh DAC dawng thei lo chuan nghak ringawt loin gas agency pan thin se, a hmunah chinfel theih tam tak a awm tih an sawi.
Lunglei district-a POL leh LPG hnianghnar dan dinhmun leh a kaihhnawih harsatna hrang hrang vil turin Joint Control Room siam niin, Flying Squad din a ni bawk a. Anni hian POL leh LPG dinhmun chu ni tin an thlithlai reng a ni.
Filling station leh gas agency endik
