Fimkhur loh vang leh suahsual hrim hrim avanga ram tikangte chungah dan anga hma la turin chief minister Lalduhoma chuan dan lekkawhtute a chah.Fimkhur loh vang leh suahsual hrim hrim avanga ram tikangte chungah dan anga hma la turin chief minister Lalduhoma chuan dan lekkawhtute a chah. February 5-9 chhunga hman tur ‘Kangmei Ven Hapta 2024’ chu Thawhtanni khan Mizorama district tinah hawn a ni a. Kumin thupui chu “Thapui thawhin kangmei chhuak tur i veng ang u” tih a ni.
Aizawla a hawnna hmanpuitu chief minister chuan, kan pi leh puten ram kang pawizia an hriat avangin lo leh huan an hal dawnin tha takin meilam an sial a, meilu khaiin an hal chauh thin a. Vanduai thila kangmei a chhuah palh pawhin a pachhuakin a thelh turin an bei thuai a, rang takin an thelh thin tih a sawi.
|hangthar fing zawka ngaihten ram kan tikang nasa a, ramngaw venhim thu-ah pipute kan tluk ta lo nia a lan thu sawiin, “Kan eizawnna atana loh theih loha lo kan hal hi chu engpawh a ni a, kan fimkhur loh vanga kan tikang thin hi en liam a har. Ngaihtuahna thar pua kangmei laka kan ram venghim tura thapui thawh turin mipui ka sawm a. Fimkhur loh vangte, suahsual vanga ram tikangte phei chu an chungah dan anga hma lo la ngei turin hmun tina dan lekkawhtute ka chah a ni,” Lalduhoma hian a ti.
State Level Committee on Fire Prevention, District Level Committee leh Village Level Committee, tlawmngai pawl leh ramkang venhimna lama mi thahnemngai te, hapta chhunga hmalakna tha tak nei tur leh hapta zawh hnuah pawh bawhzui zel turin a chah.
India ram pumah Mizoram hi ram zau zawnga tehin forest area nei zau ber a ni a, India State of Forest (ISFR) Report 2021-a a lan danin, zaa 84.53 chu forest-in a tuam. Amaherawhchu ramngaw chhah – Very Dense Forest (VDF) chu zaa 0.74 chauh niin, India hmarchhaka VDF nei tlem ber kan ni. Tlangram lo neih leh ramngaw kan nasat avangin Mizorama ramngaw kan neih a tlahniam zel a, ISFR report hnuhnung berah chuan kum 2020 aiin 2021 ah ram ngaw zau zawng hi zaa 0.88-in a tlahniam a ni.
Fimkhur lo leh suahsual vanga ram tikangte dan angin hrem r’u – Chief Minister
