LBS Suzuki Avenis, 24th Inter Branch YMA Volleyball Tournament 2026 khelh chhunzawm zel a ni a, August ni 11, Thawhlehnni khan semi-final khelh zawh a ni. Mipa final-ah Khawbel lehHunthar an intum dawn a, Pro Volleyball League 2026 final rematch hmuh tur a awm dawn. Hmeichhe lamah hnuhma nei tha pahnih Bungkawn leh Dawrpui Vengthar an intum dawn bawk.
Champion lai an tla
Mipa lama semi-final hmasa zawkah champion lai Muana Veng in Khawbel an hmachhawn a, fiahna hautak an paltlang zo lo. Champion zia lantir a chak hram hram thin Muana Veng hian Volleyball thiam khua Khawbel lakah set khat la bawk mah se final lut tur khawpin an thochhuak zo lo va, Suahdur an dawn ve mai a ngai ta n ge nge.
Khawbel hian champion lai Muana Veng lakah bul an tan tha viau a, point li a sang fal chungin set khatna an la. Set hloh hmasa zawkah tang mah se Muana Veng an insiamtha thuai. Set hnihnaah an inhnehtawk hle a, an point a inthlau lo thei hle. Inkhel hmuhnawn takah Muana Vengin set an la let.
Set khat ve ve an lak hnuin inkhel a hmuhnawm zui viau a, inhnehtawk zui viau mah se hun pawimawhah che fuh a, boruak sang ngam zawk Khawbel an dingchang a, set hnih an la zawn. Point hnih chauha sang fal chunga set thumna an lak hnuin set linaah Khawbel an chungnung leh zual a, harsatna lian an tawk lo. Champion lai Muana Veng lakah hian 25-21, 23-25, 25-23, 25-18
a hnehna changin final an lut. Final an luh theih nana khel tha tak Johan Vanneihsanga chu ‘Player of the match’ ah thlan a ni.
Khawbel hian Pro Volleyball League 2026 final-a an hneh loh Hunthar an hmachhawn zui leh dawn. Pro Volleyball League ah hneh lo bawk mah se YMA inelnaah erawh hneh thei ngei turah an inngai a, champion theihna hun tha tak an nei.
Hunthar leh bawk
Mipa lama semi-final hnuhnung zawkah Volleyball a hnuhma nei tha tak Hunthar in Nursery Veng an hmachhawn a, set hnih hloh chungin hnehna an chang a, chak a, final lut zawk chu Hunthar leh bawk an ni.
Quarter-final khel tha tak Nursery Veng hian YMA Volleyball ah vawi thum champion tawha hnuhma nei tha ber Hunthar lakah bul an tan tha lo viau a, set khatnaah point 16 bak an hmu thei lo. Awlsam taka set khatna an lak vangin Hunthar hi awlsam takin an chak leh nghe nghe tura ngaihna lian tak a awm hman.
Chhe taka bul an tan hnuin Nersery Veng an insiamtha thuai a, harsa takin set hnihna an la. Set hnihnaah hian an inhnehtawk viau a, point an inhmuh chhawk zak zak. Point hniha kalfal thei an awm loh vanga deuce a nih hnuin Nursery an chungnung a, set hnihna an la. Set an lak vangin Nurery hi an phur leh zual a, set thumnaah an khingpuite an sawp a, Hunthar in point 16 chiah an hmu.
2-1 a hma an hruai vangin final hnaih hman viau mah se Hunthar in champion zia an chhuah a, hun pawimawh leh boruak sangah zam lo leh chiai hauh lovin an inlan. Set linaah hian point li a sang fal chungin set an la. Set hnih ve ve an lak vangin deciding set khelh chhunzawm a ni. Deciding-ah Hunthar in bul an tan that an chhawr tangkai. An khingpui ten nawr na viau mah se an hawi kir duh lova, set lak belhin Nursery lakah hian 25-16, 24-26, 16-25, 25-21, 15-12 a hnehna changin final an inhlangkai zui ta a ni.
Nursery hneha final an luh theih nana thawhhlawk tak Laldampuia Chhangte chu ‘Player of the match’ ah thlan a ni.
Final chu le
LBS Suzuki Avenis, 24th Inter Branch YMA Volleyball Tournament 2026 hi August ni 14, Zirtawp zanah mipa final khelh niin a hmawrbawk a ni dawn. Zirtawp zan dar 8:00 ah final khelh tan a ni ang a, Vawi thum champion tawh Hunthar leh a vawi khat nana champion tum Khawbel an inhmachhawn ang.
Final a intum tur Hunthar leh Khawbel
