ix Kings Slam vawi khatnaa chu a hmawr bawk a hnai a, final a intum tur a hriat theih ta. Sum tamna Six King Slam final-ah tunlaia player tha filawr pahnih’ Jannik Sinner leh Carlos Alcaraz te an inhmachhawn dawn. Sinner leh Alcaraz te an inhmachhawn rual hian a tawp nan Novak Djokovic leh Rafael Nadal te an inhmachhawn ve dawn bawk.
Six King Slam semi-final hi zirtawpni khan khelh a ni a, inkhel hnuhnung zawkah World No. 1 Jannik Sinner chuan harsa takin a khingpui Novak Djokovic a hneh a, final a lut. Semi-final ngaihven hlawh zawkah hian Sinner leh Djokovic ten hmuhnawm takin bul an tan a. Kum kal meka chetha zawk leh zuan zang zawk Sinner chuan game hnih chauh hloh chungin set a la a, Djokovic lakah tha zetin bul a tan.
Bul tan chhe viau mah se Djokovic hi set hnihnaah a insiamtha a, tha takin bul a tan. Grand Slam-ah vawi 24 zet champion tawh Djokovic hian set hnihnaa tirah break a nei nghal a, 2-0 in hma a hruai nghal. Bul tan tha mah se a chesual leh teuh hle. Sinner hian pawh thlak ngei tumin tan a khawh a, 4-4 a ni leh hman hial. 4-4 a nih hnuin break nei thei an awm lova, tie-break an khel. Tie-break-ah Djokovic a chungnung viau a, set a la let.
Set hnih ve ve an lak hnuin deciding set-ah an inbei tawk leh viau a, 4-4 a ni leh hman. 4-4 a nih laiin zuan zang zawk leh fei zawk Sinner-a’n break pawimawh tak a nei. A khingpui a break hnuin Sinners hian a serve a hum zui leh nghal a, Djokovic lakah hian 6-2, 6-7, 6-4 a hnehna changin final a lut.
Jannik Sinner leh Novak Djokovic te hi kum 2024 chhungin vawi thum an inhmachhawn tawh a, Sinner a chak vek. Tennis player ropui ber Djokovic lakah vawi thum a chak zawn vangin Sinner hian Djokovic laka a record chhe tak a thaichhiah a, vawi riat an inhmachhawn tawhah vawi 4 ve ve an chak ta chiah a ni.
Semi-final hnuhnung zawkah Sinner leh Djovic te an inhmachhawn hma hian Spain player ngaihven hlawh pahnih; Carlos Alcaraz leh Rafael Nadal ten final luh an inchuh a. Kum naupang zawk Alcaraz-a’n set loh lovin a player ngaihsan em em Rafael Nadal chu 6-3 6-3 a hnehin final a lut.
Sinner vs Alcaraz
Final-a intum tur Jannik Sinner leh Carlos Alcaraz te hi kum la naupang deuh zinga player tha filawr pahnih an ni a. Kum 2024-ah Grand Slam pahnihah an champion ve ve bawk. Thahrui leh thiamna nei tha tak ni mah se tunhnaiah Carlos Alcaraz-a’n Sinner a ngam riau thung a. Spanish hian Italian lakah vawi thum hnehna a chang zawn tawh a. Vawi 10 an inhmachhawn tawhah 6-4 in hma a hruai mek bawk.
Djokovic vs Nadal ; Final-ah Sinner leh Alcaraz te an intum hmain pathumna zawn a ni dawn a, pathumna inchuhin player ropui pahnih Novak Djokovic leh Rafael Nadal te an inkhel dawn. Djokovic leh Nadal te hi vawi 60 zet an inhmachhawn tawh a, 31-29 in Djokovic a chungnung mek. Grand Slam-a vawi 22 champion tawh Nadal hian Tennis a chawlhsan tep tawh a. Six King Slam hi inelnaah Djokovic leh Nadal te an intum hnuhnung ber a ni dawn.
Final ah Sinner leh Alcaraz
