January 24, Zirtawpni khan Australian Open mipa semi-final khelh a ni a. Champion lai Jannik Sinner leh seed no 2 Alexander Zverev ten hnehna changin final an lut. Final hi Pathianni chawhnuah khelh a nih ang.
Semi-final hmasa zawkah he hmuna vawi 10 zet champion tawh Novak Djokovic leh Alexander Zverev te an inhmachhawn. Djokovic leh Zverev te hian inhnehtawk taka bul tanin, inkhel hmuhnawm lantir bawk mah se beisei loh takin a tawp a. Set khat an khel zo chauh tihin Djokovic chu hliam vangin a inlan zui thei tawh lo.
Djokovic leh Zverev te hi an inhnehtawk viau a, set khatnaah break an nei thei lo ve ve a, tie-break khelh a ngai nghal. Tie-break-ah Djokovic tihsual vangin Zverev chuan 7-6 (7-5) in set a la. Inkhel hmuhnawm tak en chhunzawm beisei a nih laiin Novak Djokovic chuan a khingpui Zverev panin a chibai a, chair umpire chibai zui lehin inkhel a tawp thut. Boxing-a inhnek ngaihven leh boruak lian tak first round a tawp thut ang maiin a hmuna inkhel entute an hrilhhai viau a. Hliam vanga inlan zui thei lo Djokovic-a’n khelmual a chhuahsan laiin an boo khum nasa hle nghe nghe.
Djokovic lakah hnehna chang a, a vawi khat nan Grand Slam final a luh hnuin Alexander Zverev chuan hliam vanga inlan zui thei lo player te hmuhsit a, auel lo turin Rod Lever Arena-a inkhel entute a ngen. Hliam vanga inlan zui thei ta lo Djokovic chuan kum 20 chhungin Tennis-ah a theihna zawng zawng hlan tawhin zah phu tak a nih thu leh player ropui ber a nih thu a sawi tel bawk. A vawi khat nana Australian Open final lut Zverev hian final-ah champion lai Jannik Sinner a hmachhawn zui leh dawn a, Grand Slam-ah a vawi khat nan champion theihna hun tha tak a nei.
Hliam vanga semi-final a khelh zawh theih loh hnuin Djokovic hma lam hun tur a chiang lo thar a, Australian Open-ah a inlan leh kher ang em tih a chiang ta lo hle. Khelmual a chhuahsan hnuin Serbian pa huaisen Djokovic hian, “Melbourne Park-ah a inlan leh kher ang em tih a chian loh thu a sawi a. A dam tha a, phurna a la nei a nih chuan a inlan leh thut mai thei a. Chutih lai chuan kum 2025 hi a season hnuhnung ber a nih mai theih thu a sawi tel bawk. Chawn thla hliamin a tihbuai nawn leh vangin Grand Slam-a vawi 24 champion tawh Nole hi rin aia hmain Tennis chawlhsan thei dinhmunah a ding mek.
Thluak a hman ve det thin vangin Djokovic hian sawisel a hlawh hle thin a, ‘inhliam der hrat’ ang hiala sawi puhtu tam tak an awm thin. Quarter-final-ah Carlos Alcaraz a hmachhawn tum khan hliamin a tibuai tawh a, medical time-out a la hial nghe nghe a nih kha. Khami tum pawh khan ngaihtuahna fim zawk a neih theih nana remchang zawng nia ngaihna lian tak a lo awm tawh. Mah se, a hliam hi rinaiin a lo na daih mai a, practice lovin Alexander Zverev a hmachhawn a. German second seed Zverev lakah khel chhe lem lo viau mah se a khel tluan thei ta ngang lo va, uiawm takin a inhnukdawk zui ta a ni.
Sinner a chak awlsam
Semi-final hnuhnung zawkah champion lai Jannik Sinner chuan American Ben Shelton a hmachhawn a, awlsam taka hnehna changin final a lut a. Australian Open-ah champion nawn leh turin vawi khat chak chiah a ngai tawh.
Sinner leh Shelton te hi set khatnaah an inhnehtawk viau a, tie-break khelh a ngai hial. Tie-break-ah Sinner a chungnung viau thung. Harsa taka set khatna a lak hnuin Jannik Sinner a khel tha zui viau a, set hnihna leh set thumnaah game hnih ve ve chauh hlohin set a la zawn leh a, Shelton lakah hian 7-6 (7-2), 6-2, 6-2 a hnehna changin final a lut zui leh ta a ni.
Sinner vs Zverev
Final-a inhmachhawn tur Jannik Sinner leh Alexander Zverev te hi vawi ruk an lo inhmachhawn tawh a, kum upa leh tawnhriat nghah zawk Zverev hi 4-2 in a chungnung mek. An inkhelh hnuhnung berah Sinner chak bawk mah se hart-court lamah Zverev a khelh that theih em vangin Zverev hian Grand Slam-ah champion theihna hun tha tak a nei thei tura ngaih a ni. Olympic leh ATP Finals-a champion tawh Zverev hi Grand Slam-ah a champion thei a nih chuan Tennis player ropui huangah ziah luh a ni ang.
World No. 1 Jannik Sinner leh No 2, Alexader Zverev te hi tunhnaia chetha dun tak mai an ni a, final-ah inkhel hmuhnawm tak an lantir ngei a beiseiawm hle. Pathian chawhnu nghakhlel takin thlir ang u.
Final ah Sinner leh Zverev
