Final race-a inchinfel ngai turin Malaysia tlankawngah Bagnaia a chak

Final race-a inchinfel ngai turin
Malaysia tlankawngah Bagnaia a chak
Pathianni Malaysian Grand Prix-ah hnehna changin defending champion Francesco Bagnaia chuan intlansiak vawikhat chauh awm tawhah a title kawl lai humhim turin beiseina a la nei chhunzawm zel a, hmahruaitu Jorge Martin nen point 24-in an inthlau a, November ni 15 khian season khar tur leh title race hmawr bawk turin Spanish leilungah inchinfelna hun an hmang ang.
Europe top flight football league hrang hrang leh Formula One lamahte pawh league tawp ni leh race final round thlen hmaa champion tur hriat loh, a tawp nia inchinfel ngaih tum a awm fo a; chutih rualin, final day hma daih, league match leh race vawi 2/3/4/5 hmabak la awm chunga champion kawh tur awm fel der tawh tum pawh a awm thin ang khan kumin MotoGP-ah pawh intlansiak tawp niah title race a tawp chauh dawn a ni.
Kumin hi a zawna kum thum chhung teh meuh chutianga final day-a champion tur an zawnna tur a ni ta a, bike intlansiak level sang ber MotoGP-ah hian rider-te an inthlau lo viau thin a ni.
Barcelona tlankawnga season hmawrbawkna race an tlan turah hian point 37 beisei tur a la awm a, Italian rider Bagnaia hian a title kawl lai a humhim dawn nge Spaniard Martin-a kum a herchhuak dawn tih sawilawk theih a ni rih lo.
Nimin Sepang tlankawngah Malaysian Grand Prix-ah vawihnih champion tawh Bagnaia chuan season kal laia a vawi 10-na atan race hnehna a chang a; championship hmahruaitu leh title race-a a elpui lian ber ni bawk Pramac Racing rider Martin a hmakhalh leh rih avangin final race-a inchingfel turin an tindarh leh ta rih a ni!
Kum 26-a upa Martin kha chak se a career-a a vawikhatna atan MotoGP champion ni ve tawh mai tur a ni a, lap tir lamah Italian hmakhalhin hma pawh a hruai zak zak fo a, mahse, inbeihna chep takah champion lai hmakhalh zo loin pahnihnaah a thleng a, season tawp nia inbeihna hautak leh hnuhnung a nghah a ngai ta zawk a ni.
Spaniard Martin chuan, “Lap tir lamah kha chuan show hmuhnawm tak kan entir a, mahse, min lehpelh tak hnu kha chuan ka tan han fight let ngaihna a awm ta lo a ni.
“A tawp lamah khan han nawr leh ngual ka tum a, mahse, ka chesual lek lek a, point riat hmuh pawh kha a ropui lutuk tho e tiin pahnihna kha ka lungawipui mai a ngai ta a ni,” tiin tlanchhuah zawh loh palh ai chuan a hmaa tlan lehpelh tuma risk lak loh mai kha a thlang ta zawk tih a sawi.
Italian rider Bagnaia pawhin chak mamawh Jorge Martib-a dinhmun a hriatthiampui thu sawiin, “A hnunga min dah a mamawh tih hre chungin a mi nawr a na hle a, mahse, kan inthlauhna leh in um dan kha a zim em mai a, a tum angin a awm thei ta bik lo a ni.
“Pathianni intlansiak ang bawk khan kan hmabak la awmah kei pawhin attacking lam bawk ka buaipui leh thei dawn a, tun ai khan ka tawrhhlelhawm zawk thei,” tiin a title kawl lai humhim tura chance a la neih bawhpelh a tum loh thu a sawi ve bawk.
Sepang International Circuit-a intlantansiak tir lamah turn two-a Brad Binder, Jack Miller leh Fabio Quartararo-te insutbuai avangin red flag vai hmuh tur a awm hma hle a; kha chetsualna avang khan Red Bull KTM rider pahnih Binder leh Miller phei chu an tlanchhuah zawh loh phah nghe nghe.
Miller khan tlankawng sirah damdawi thiamte enkawlna dawng bawk mah se hliam serious a nei lo hlauh a; Binder pawh ngaihtuahawm ni lo mah se intlansiak a chhunzawm thei ta lo.
MotoGP-a vawiruk champion tawh Marc Marquez pawh lawmman semna dawhsan beiseia pathumna dinhmun a luah hnuah a chesual a, 12-naah thleng pha ta chauhin, a hmunah Enea Bastianini a thu ta zawk a ni.
November ni 15 final race hi Valencia khaw thlen tur a nih laiin tuilianin Spain a tibuai mek a, Valencia pawh hi a tuartu an nih avangin Barcelona lamah an sawn ta a ni.