Finance Commission hna khirh hle dawn

Sorkar laipui chuan rei lo te hnuah Finance Commission thar a din dawn a, Centre tax revenue atangin engzah nge State-te hnenah pek tur tih leh, State-te a semdarh dan tur ruahman a ni dawn.
Pre-reform period kha chuan Finance Commission rawtna siam te chu pawimawh ber anga ngaih a ni ngai lo, a chhan ber pawh Centre chuan State te hnenah leh a duhsak bik te chu plan financing leh public sector undertaking (PSU) investment hmangin a vur thei thin a. Post-reform hnuah erawh PSU investment thar a awm mang tawh lo va, chumai bakah Planning Commission chu kum 2014-ah thiah ni tawhin hei vang hian Finance Commission chu India fiscal federalism architect ber a ni zui tawh a. A mawhphurhna leh thiltihtheihnate chu a nasa zual hle tawh a ni.
Tun dinhmunah Cente chuan State-te hnenah a tax pool atangin 41% a pe a. State-te chuan hei aia sang hi an ngiat ngei dawn a, mahse Centre sum hman dan leh a borrowing limit chhut chuan pek belh theiin a lang lo tiin mithiamte chuan an sawi a, hei vang hian inhnialna tam ber tur chu distribution formula-in a luah dawn, an ti bawk.
Finance Commission hnuhnung ber kha kum 2017-ah din a ni a, a ‘term of reference’ pawhin inhnialna siamin a chhan berah pawh State te expenditure pek turah 2011 population behchhan tura an tih vang a ni. Centre hian kum 1971 population number kha hmang thinin chutia a tihna chhan ber pawh State thenkhatte family planning ngaihsak hauh lova ‘share of devolution’ chan san tum thin te danna chi khat a ni a. State thenkhat a bik takin chhim lam state-te population growth mumal tak nei zawkte chuan tuna ‘base year’ thlak hi an duh lo hle a, state ti tha te hremna a ni, an ti.
Hei bakah hian revenue deficit grant pek chungchangah pawh inhnialna a awm bawk a, Finance Commission chuan State-te tax devolution hnua current account a a deficit la nei tho te hnenah sum a pek belh thin a. Hei vang hian Finance Commission-in zangna-dawmna a pek zel tho dawn chuan eng vangin nge State-in revenue tihsan kan tum ang, tia zawhnate pawh a awm a ni.
Finance Commission hian State in deficit a neih te chu fiscal lama a chet theih lohna nge fiscal lam enkawl a thiam loh hrim hrim vang zawk tihah chhanna chiang tak a nei thei ngai lo an ti. Hei vang hian State che tha lote hrem chuang si lovin State deficit nei te thlawpna tur distribution formula a siam thin a, mahse, hei hi nasa taka sawisel a ni thung a ni.
Tun hnaiah heta inhnialna hi state leh state inkarah pawh politics thil taka kalpui niin a nasa tial tial a. Thla kalta lawka BJP tena Karnataka inthlana chakna an chan loh khan political commentator te chuan India ramah ‘North-South divide’ a nsa an ti tawh a, BJP te chu India north lamah inthlurbingin opposition te chuan southern State-ah thuneihna an chang thung an ti. Southern State te chu infrastructure, private investment, social indicator leh rule of law ah te tha ber an ni bawk si a, hei vang hian hmasawnna lamah leh hnianghnarna lamah sang zawkin north-south gap a sang zel an ti bawk.
Hei vang tak hian State hausa tena state rethei te an puih theih nana sem darh hna mumal leh fel taka siam chu tihmakmawh a ni tho va. Chu mi tha taka kalpui a nih theih nana chuan sorkarin hna hautak tak neiin Finance Commission chuan mumal leh fel taka ruahmanna a siam ngei a ngai dawn zual a ni.
Hei vang hian Finance Commission din thar tur chuan thil pahnih pawimawh tak tak thlurbing ngei tur a nei tih a ni a. Pakhatna chu Centre in tax tisang lova cess leh surcharge tihsan vak a sim a ngai ang an ti a. Tun hnaia Tamil Nadu sorkarin white paper a tihchhuahah Centre in cess leh surcharge hmang tax revenue a hmuh chu kum 2019-12 a 10.4% atangin 2019-20 ah chuan a let hnih dawn 20.2% ah a sang dawrh tiin an sawi.
Revenue tipung tur chuan tax tihsan a ngai a, Centre in a tisang dawn a nih chuan 41 paise chu State te hnenah a pek ngai a ni. Mahse, sum siambelh duha surcharge hmanga chet a la a nih chuan Centre in a tel vek thung a. Kum 2000 a Constitution amend a nih khan State chu Centra total tax pool thal thei tura siam niin chuta inhriatthiamna ang tur chuan Centre chuan lohtheihlohah lo chuan cess leh surcharge a tisang tur a ni lo tih a ni. Tunah erawh Centre chuan a bawhchhia anga langin hei vang hian State te chuan national tax revenue an share tur laksakin an awmah an inngai a. Hei vang tak hian Finance Commission thar chuan guidelines mumal zawk a neih ngei a ngai dawn a ni.
Pahnihnaah chuan Finance Commission chuan freebies tia sawia sum sen a khuahkhirh ngei ngei a ngai. He thilah hian party tin te chu fihlim an awm thak lo va, kawng eng emaw talin inhnamhnawihna an nei vek.
Ram rethei India ram angah mi maktaduai telin mamawh bulthut pawh phuhru thei lova an awm laia miretheite puihna dodal chu awm ang lo tia ngaih theih a nih rualin India chu a retheih em avangin freebies pekah a fimkhur zual a ngai zawk tih a ni.
A theory ang chuan Fiscal Responsibility and Budget Management (FRBM) Act in khuahkhirhna a siam te chu populist spending thunun thei tur a ni a, mahse, sorkar ber chuan budget book-a lang si lova sum sen a thiam em em thung. Freebies tih hrim hrim pawh sawifiah har a ni a, khuahkhirhna siam tum ngawt chuan elected government sovereignty a namnul tia puh theih a ni thei bawk. Mahse, Finance Commission thar chuan long-term fiscal responsibility hisapin freebies thila sum sen dan turah guidelines a siam ngei ngai tih a ni bawk.
Karnataka inthlana BJP te an chakloh hnuah Prime Minister chuan Karnataka Congress te thutiam (guarantee) chu kalpui ngaihna awm lo a ti a, kalpui luih a nih chuan ‘ram leh state a tlachhia ang’ tiin a sawi hial a, a tawngkam a na hle.
Kuminah State inthlang tur an la awm nual a, chutah chuan prime minister chuan engtiangin nge hma a lak dawn a, freebies te hnawl thei turin eng good governance te a tiam ang tih chu thlir mek a ni bawk.