By Familia Fanai Lal\ansanga
A mak khawp mai! India ram pum huap chhiarpui hnuhnung ber kum 2011 khan Mizoram hi mi za zelah ziak leh chhiar thiam 91.3 awm ang kan ni a. Literacy rate 91.3% tihna a ni a. India ramah Kerala an sang ber a, 94.0 % an ni a, Lakshadweep state in a dawt a, 91.8% a ni a. Mizoram hian literacy rate-ah India ram pumah pathumna kan hauh mek a ni. Chutih laiin, ngai teh, financial literacy-ah chuan Mizoram hi ram thim kan ni a, financial literacy-ah chuan kan hniam khawp mai a, India ram pumah a hniam ber pawl kan ni.
Chu kan sihhnipna lai tak chu Governor Hari Babu Kambhampati chuan a rawn sawi chhuak ta khauh mai le!
Governor Hari Babu Kambhampati chuan Thawhtanni, 13.2.2023 chawhma khan Financial Literacy Week 2023 chu Auditorium, Mizoram Rural Bank, MINECO-ah a hawng a. FLC 2023 chhung hian thupui atan “Good Financial Behaviour – Your Saviour” tih hman a ni a.
“Governor urged the RBI officials in Mizoram and all the banking fraternity in the State to try their best effort in the FLC 2023 campaign to close the gap between the high literacy rate and the low financial literacy rate in the state” tih thu hi DIPR, Mizoram chuan, “Governor chuan Mizoram chu Ziak leh chhiar tamna ber state pakhat a ni a, bank services lama hawiharh kawngah erawh a hnufual pawl kan ni mek thung a,” tiin an letling a, an letling fuh zan lo emaw ni aw ka ti deuh!
“Governor chuan Reserve Bank of India thuneitute leh bank dang hotute chu he FLC 2023 beihpuithlak hi remchanna leiin Mizorama literacy rate sang tak si leh financial literacy hniam lutuk si inkar zau tak hi tihziaawm dan ngaihtuah nan hmang se tiin a fuih a,” tiin letling ta zawk ila, a fiah deuh zawk awm e.
Kum 2008 November thla khan International Flower Expo, Pune chhim turin kan kal a. Mizorama chiahpuam vanglai tak kha a ni a. Mizoram House, Salt Lake, Kolkata kan thlen zan takin chiahpuama a kaikuang an man thu kan hria a. Chiahpuam khan Mizote hi financial literacy lamah mitdel leh bengngawng mai kan nihzia a pho lang chiang khawp mai. Sumah chuan kan mit hi a del hlauh a, kan chhia leh tha hriatna (conscience) hi a chawmawlh vek bawk a, mi mawl pawhin mipui khati zat kha min bum thei chu a ni a. A rapthlak ngawt mai!
Kum 2016 khan Financial Education Training For Teachers Training, SCERT, Chaltlangah ka va chhim ve a. National Institute of Securities Markets (NISM), Mumbai atangin resource person pathumin zirtirna min pe chu hlawk hi ka han ti mai mai khawp a. Mizoram hi India rama lehkhathiam tam ber 3-na ang te hialin kan sawi thin a, Kolkata khawpui veng lian khata mihring cheng zat khu Mizoram pum mihring awm zat hian kan zat pha lo hrim hrim a, mihring za zelah 90 aia tam hret chu ziak leh chhiar thiam kan ni e, tihna mai zawk a ni. Literate atanga educated thleng tur chuan a kawng a la thui fu. Kum 2014 survey-a a lan danin Financial literacy-ah chuan mihring za zela chhutin India ramah Mizoram hi a hniam ber dawttu kan lo ni reng mai! Bum nuam tak tur chu kan lo ni reng a ni.
Mumbai Institute of Security Market, an Educational Initiative of SEBE Chairman Mr. Sandip Ghose-a’n min lecture kha ka ei khawp mai a, “Engah nge fai taka i inchei ziah loh? Ni khatah darkar 24 hun i nei a, darkar khat hi chu vawi khat pian manah i tui zawng tak, nuam i tih zawng tak tih nan hmang ngei ngei ang che? Darkar khat hi chu i hriselna atan exer la ziah ang che? Mi dang tan malsawmna kan nih theih nan kan rilru kan tihthianghlim phawt a ngai, etc.. Sandip Ghose Nun dan lecture, sermon tenau a han thlak zet chu Camping vawi 7 luh leh Robin Sharma thuziak chhiar aiin ka hlawkpui zawk fe a ni e. Ka nun, ka lifestyle a ti danglam bawih thei zuk nia!
Financial education leh financial literacy lam hi Mizote hian kan bengkhawn a hun ta hle a ni.