Firehouse frontman CJ Snare a thi

Firehouse frontman CJ Snare a thi

‘Love of a Lifetime’ leh ‘When I Look Into Your Eyes’ hlate avanga kan hriat lar, 2008-a Lammual-a show rawn nei tawh, Firehouse founding member leh an frontman CJ Snare, kum 64, chu April ni 5 zan khan a chenna inah a thi tih nimin khan Firehouse Facebook page-ah an tarlang.
CJ Snare i a pum zai a ni a, tunah hian a dam tha leh tawh viau a, tun nipui laia tour leh turin band pawh an inpuahchah mek a, mahse, an Facebook page-a chuan, “Vawiin hi Rock N Roll tana ni lungchhiat thlak a ni. Lungngai tak chungin kan unaupa: CJ Snare, rock and roll pasaltha, lead vocalist leh Firehouse founding member kan chan ta tih khawvel kan hriattir a tul ta si,” tiin an tarlang.
Nikum October khan Snare hian a Instagram-ah zaipui a tawh thu a lo ouang tawh a, dam leh thuai a stage-a inlan theih vat a chak thu te a tarlang bawk. Kumin March ni 27 khan Snare hian a hriselna pawh a that zel thu puangin, “In beisei aia hmain FireHouse nen stage-ah kan rawn inlan leh ang. Hriselna a pawimawh hmasa a, chuvangin kan rawn kir leh hmain dam ver vawr phawt a ngai a ni,” a ti bawk.
Firehouse hi 1980s kum chawhnu lam deuha indin niin, 1989-ah Epic Records hnuaiah an inziak lut a, Billboard Hot 100 chart-a top 10 kai thei hla pahnih neiin, a album hmasa ber, an bang hming chawia ‘Firehouse’ an tihchhuah atangin hriat an hlawh nghal hle a, 90’s kum hmasa lama hla lar tak ‘Love of a Lifetime’ chu 1991-ah an tichhuak a, 1992-ah ‘When I Look Into Your Eyes’ an tichhuak leh bawk a, chu chu rimawi khawvelin a hmelhriat tak tak a ni ta a ni.
1992-ah an album pahnihna ‘Hold Your Fire’ an tichhuak leh a, ‘Reach for the Sky’ leh ‘When I Look Into Your Eyes’ hlate awmna kha niin, Hot 100 chart-ah No.8 a kai pha a, he chart-a an hla thleng sang ber a ni zui ta a ni.
Firehouse hian 2003-a an album ‘Prime Time’ hnuah album emaw hla thar emaw nei tawh lo mah se band angin an la active reng tho a, Snare inzai thlengin an la che chhuak reng a ni. Snare pum an zaina chhan hi cancer niin report a awm a, tuna a thihna chhan pawh hi official-a puan ni lo mah se cardiac arrest (lungphu chawl) niin report a awm bawk. Snare hian a fate pathum a kalsan a ni.

Comments (0)
Add Comment