First-team squad-ah Mbappe a kirleh
Paris St Germain forward Kylian Mbappe chu season thar inbuatsaihna an kalpui laiin first-team squad-ah a tel lo a, Asia khawmualpuia pre-season tour-ah pawh a fehchhuak ve lo a, Inrinnia Ligue 1 season bul an tanna inkhelah Lorient hmachhawn loin an pawl inkhel chu mualsir atangin a thlir bawk a, September ni 1-a khar tur nipui insuan hun lai hian Parc des Princes atanga kalbo tur zinga chhiar a nih hman laiin first-team squad-ah a kirleh a, team rualin training a zawm ve leh ta phawt.
Pathianni khan Mbappe hian Paris St Germain first team a zawm a, chumi chungchangah chuan PSG pawhin thu-chhuah siamin, “Lorient nen kan inkhelh hmaa PSG leh Kylian Mbappe inbiakna beiseiawm tak kan zawh fel hnuah tukin zing khan first-team training squad a zawm fel ve leh ta,” tiin.
Lorient nen goal awm loa an inhneh-tawk tum khan a hma ni chiaha lei fel hlawt Ousmane Dembele pawhin inkhel entute thutna atangin a team thar bultanna inkhel a thlir ve bawk.
France captain-in nakum nipui thawt ruala a contract zo ve tawh tur pawhsei tumna a neih loh thu a sawi rualin Mbappe leh PSG inkar boruak a rit nghal a; 2023-24 season tawp ruala man nei loa Paris chhuah-san tawh tur a nih avangin PSG tan an superstar hmalam hun chu mutmawh hnarmawha neih tham a tling lo thei lo a; hlutna a neih laia an hralhchhuah loh chuan a hralhna sum rut loa an sezawl chhuah tawp a ngai dawn a, buaipui loh theih a ni lo ang.
PSG president Nasser Al-Khelaifi chuan euro maktaduai 180 (USD 196.99 million) senga a lakluh kum 24 mi hi free transfer-a chhuahtir a tum loh thu a lo sawi tawh a, chuti a nih chuan inremna thar ziahpui emaw kumin nipui transfer hun laia hralhchhuah emaw chu duhthlan tur a neihchhun niin a lang.
Lorient laka league season bul an tan hma khan manager Luis Enrique chuan club-in Mbappe laka an harsatna tawh chu an chinfel theih a beisei thu sawiin, tunhma lam pawhin an striker rinrawl thlun ngheh kawngah tawnhriat an lo nei tawh tih a sawichhuak.
Season hnuhnung panga chhunga Ligue 1 top scorer ni fai vek thei Mbappe hian 2021-22 campaign tawp rual khan free transfer-a chhuah a lo tum tawh a, mahse, PSG lamin Real Madrid dawrna an hnawl avangin nikum khan contract a pawtsei leh ta zawk a ni.
Tun thlengin Mbappe hian Spanish giants lam a la awn reng tih hriat a ni a, Bernabeu club-a sum tam zawk hlawh turin free agent ni chunga Paris chhuahsan a duh a, a club vawn laiah tun thlengin contract thar pawh a la ziak duh lo a, season thar inbuatsaihna lamah pawh first-team squad a zawm duh lo a, mahse, tunah first-team squad rualin training a zawm leh ta a, nikum ang bawk khan kumkhat daih inremna thar a ziak leh nge nge dawn niin a lang a, chuti a nih chuan kum 2025 thleng PSG thuam a inbel leh ang a, a hnu lamah man neiin Real hnenah an hralhchhuak dawn a nih hmel?!
Tarlan tawh thin angin, thla hmasa mai khan PSG chuan Saudi Arabian club Al-Hilal hnenah an captain chu world-record £259m bid-a biak an phalsak a, mahse, Champions League trophy la hawn ve lo Mbappe hian a vanglaia Arab rama in-phumbo hi a la ngaingam lo niin a lang a, Gufl team dawrna hnawlin first-team training a zawm leh ta zawk a ni.
Mbappe hian kum 2017 khan Monaco atangin loan-in PSG a zawm phawt a, a hnuah Ligue 1 club hian a chunga tarlan tawh zatin an lei nghet a, he thu buatsaih lai thleng hian a club vawn lai tan game 260-ah goal 212 a thun tling tawh.
Kartawp Inrinni hian Ligue 1 match khelin PSG an chechhuak leh dawn a, Toulouse an tum hunah Mbappe hi a inlan dawn em tih sawichian a la awm lo.
First-team squad-ah Mbappe a kirleh
