MNF sawrkar flagship programme tia chief minister-in a sawi raw chin chu a hlawhchham chian em avangin tun inthlan turah MNF-in an sawi ri ngam tawh lo tih ZPM hruaitu, MLA hlui Dr Vanlalthlana chuan a sawi.
Thuchah siamin Dr Vanlalthlana chuan 2019 June-a Budget Session neihah chief minister Pu Zoramthanga’n MNF sawrkar flagship programme-a rua chin a nih thu hi a sawi tih sawichhawngin, ‘Sum tam tak sen a nih hnu ah, a hlawhchham tak em avangin, karleh maia inthlan turah MNF campaigner tumahin sawichhuah pawh an ngam tawh lo. An flagship programme – raw chin hi a hlawhtlinna engmah sawi tur an neih loh avangin hemi lama zawhna chhan pawh harsa an ti hle,’ a ti.
June 2019-a Assembly Session neihah Pu Zoramthanga hian mau hmanga hma an lak dan turah khaw hrang hranga mipui intelkhawma society anga kalpui tum a ni tih a sawi thu te, a tlem thei ang bera chhut pawhin thingtlang in 100 khua vel chuan rua hi kum khatah nuai thum vel an thar theih tur thu te, hemi sawngbawl tur hian an khaw hmunah industry din nghal zel a nih tur thu leh, hei hi thalaite tan hnathawh tur siamtu tha tak a nih nghal dawn thu te a sawi tih a sawi a ni.
Tunhnaia Horticulture department-in Family Oriented SEDP dawngtute hlawhtlinna tarlanna lehkhabu ‘SEDP Lawmna Thangkhawk’ a tihchhuahah dragon fruit, lakhuihthei, khanghu leh a dangte tarlan a nih hnu ah, a tawp berah Khawzawl lama rua chingtu hlawhtling tarlan a ni tih Dr Vanlalthlana hian sawiin, ‘Rua ching hlawhtling pakhat chauh tarlan a nih laiin, chik taka en chuan rua chingtu hian kum 2013 daih tawh khan a lo ching tawh a. Heti a nih chuan SEDP hnuaiah hian rua chingtu tumah an la hlawhtling lo. Kum khata a nu chen theia sawi raw thami kha an ching ta lo nge, sawrkarin raw chi supply tute sum siam nan an flagship programme an hmang ta zawk tih hi mipui zawhna lian ber a ni a. Kum 5 chhunga mahni flagship programme ber hlawhtlinna sawi tur nei lo hian eng chhuanlam nge an neih a, kan chief minister sawi anga IAS hoin ban an duh hialna tur khawpa ruahmanna felfai an neih loh zia a tichiang hle,’ a ti.
Flagship programme hlawhchham ‘rua’ – Dr Vanlalthlana
