FLAM-in tuihna humhalh sawi
MLA hlui intelkhawmna, Former Legislators Association of Mizoram (FLAM) chuan Ningani khan Aizawlah general body meeting an nei a. Thupuiah ‘Ramngaw, Nungcha leh Tuihna humhalh’ an hmang.
He hun hmanpuitu minister Dr R Lalthangliana chuan, FLAM-in party bil sawi loa luangrual taka an thawk ho thin chu lawmawm a tih thu a sawi a. Inhmuhkhawm thupuia an thlan chu khawvelin a buaipui mek leh kan ram pawhin a mamawh em em a ni, tiin, a hlawhtlin theihna’n theihtawpa hma la turin a sawm.
Inkhawm tum khatnaah hian tunhnaia an member chatuan ram pan – K Thanpari (80) w/o C Sangzuala, Lalhmingthanga (82), R Khawpuithanga (81) leh Lalrinmawia (76) te sunna hun an hmang a. SIPMIU director Er Rothanga’n thupui thlan – “Tuihna humhalh” a sawi a. MZU atangin Prof. Lalnuntluanga’n “Ramngaw leh Nungcha humhalh” tih hmangin thu a sawi bawk.
FLAM hi kum 1994-a din a ni a, Mizoram Assembly kum 50 chhung hian MLA 232 an awm tawh a; member 95 chatuan ram pan an awm tawh. FLAM hian inthlanna thianghlim leh senso tlem zawk neih theihna’n hma an la mek a, hemi atan hian kohhran, tlawmngai pawl leh political party hrang hrangte nen an thawkho a ni.
FLAM-in tuihna humhalh sawi
![](https://theaizawlpost.org/wp-content/uploads/tap_logo-min-large.jpg)