Florence Nightingale Award
dawngtute chawimawina hlan
Kum 2020- 2021 chhunga Mizo zinga National Florence Nightingale Award dawngte chu Zirtawpni khan International Nurses Day denchhenin chawimawi an ni.
He hun hmanpuitu Health minister Dr R Lalthangliana chuan Mizo hmeichhiate zinga dawng an awm thin chu ropui a tih thu sawiin, lawmman dawngte chu midangte tana inpe leh malsawmna ni chhunzawm zel turin a fuih a. Minister chuan nurse hna thawk mekte leh pension tawhte, medical lama thawkte chu an hna pawimawh zia hria a, damlo leh chan chhe zawkte hmangaihna, duhsakna leh khawngaihnha tak tak nena enkawl zel turin a chah.
Nurse hnathawk thate chawimawina – ‘National Florence Nightingale Award’ hi kum 1973 atanga kalpui tan a ni a. Mizoram nurse 14-in he award hi an dawng tawh. Award hi nurse zirtirtute, damlo enkawla hospital-a thawkte leh vantlang hriselna tura thawk ANM-te tan dil theih a ni.
Tun tuma Florence Nightingale Award hlan, chawimawi tak te chu – C. Dengthangpui, health supervisor (Rtd); Vanlalthuami, health worker; Vanlalrovi, GNM staff nurse an ni a. Certificate leh sumfai hlan an ni.
Florence Nightingale Award dawngtute chawimawina hlan
