FMR hlih leh ramri hung hian
misual ruihhlo tawlh a dang lo
– ZoRO
Zo Re-Unification Organisation chuan free movement regime (FMR) hlih leh ramri hung chuan ramri kana misualte chetna leh ruihhlo tawlh a dang loa, a dan dan tha ber chu check gate neia duty thin heng sualna dotute tih chak a ni zawk tih a sawi.
ZORO Gen. Hqrs. thuchhuak chuan, India sawrkarin Myanmar nen zalen taka inkalpawh theihna dan hlip a, ramri hung a tum chu Zofa hnam kal zel tur tana him lo, kan dikna chanvo rahbehna leh chhuhsakna a ni a. He thu a rik tirh khan Zofaten kan helhin kan duh lo tlang hle a. ZORO bakah NGO hrang hrang leh political party-ten dodalin, Mizoram Legislative Assembly Session-ah pawh duh lohna resolution lungrual taka pass a ni tih a sawi.
‘Khati khawpa kan duh loh tlan, hun reilote hnu leka social media-a ngaihdan /duhdan thlak kan awm hi a pawi a. Hetianga ngaihdan siam tawhte pawhin hnam tana a pawi thui dan tur, kan ram nasa taka kan chan dan tur leh kan eizawnna, leilet thlenga kan chan nasat dan tur hre thar chunga ngaihtuahna seng nawn turin mipui kan ngen a ni,’ a ti.
FMR hlipa ramri hung chuan misual, ruihhlo tawlh thinte a dan a rinawm loh, tiin, ruihhlo leh dan loa sumdawnna avanga kan dikna chanvo chhuhsak leh kan hnam hma hun thui tak chhe tur, ram tam tak kan chan tur leh kan eizawnna thlenga nasa taka a ngawng tur ngaihtuahin a tuar tur chu midik, mifel bak an nih a rinawm loh tih a sawi.
Heng dan dan tha ber, fencing hma pawha ruihhlo kaltlangna ber check gate-a duty (Assam Rifles. Mizoram Police leh Customs) tichak tur leh ruihhlo kaihhnawiha sumdawngte beihpui thlak takmeuha zawn chhuah hna nasa lehzuala thawk turin ZORO chuan India sawrkar leh Mizoram sawrkar a ngen tih a sawi a ni.
FMR hlih leh ramri hung hian misual ruihhlo tawlh a dang lo – ZoRO
