FMR hlihin inkalpawhna
lamah harsatna siam tum lo
– Larsap
Free Movement Regime (FMR) hlih chuan inkalpawhna lamah harsatna siam a tum loa, dan loa thil tih a veng dawn tih Mizoram larsap chuan a sawi.
Larsap Gen. Vijay Kumar Singh (Retd) hian Nilaini khan lehlangin Lawngtlai district a tlawh a. Helai biala MLA, Member of District Council, sawrkar hnathawk, VC leh NGO hruaitute nen an inkawmnaah, ramri bulhnaia awmte zalen taka inkalpawhna – FMR chu tunhma atanga lo neih tawh a ni a, sawrkar laipuiin tihbuai a tum lo tih a sawi.
“Tunhnaiah thenawm ram buai avangin khua leh tuite him zawkna atan leh dan loa ramri kana thil tih a awm lohnan inkaihhruaina thar siam a ni a, hei hian inkalpawhnaah harsatna siam a tum loa, dan loa thil tih a veng dawn a, khua leh tuite tana tha tura ruahman zawk a ni,” a ti. Ramri kaltlanga ruihhlo tawlhruk a hluar chu veiawm a tih thu sawiin, Mizoram chu ram ralmuang leh nuam a nih zel theihnan tanrual a tul tih a sawi a ni.
Lawngtlai district khaw 13, power supply la pek lohten an neih thuai theihnan hma lak a tul tih larsap hian sawiin, sawrkar department, VC leh NGO te chu khawtlanga dawmkan ngaite ngaihvena puih tum turin a chah.
Numaligarh Refinery Limited-in Lawngtlai district-a zirna tihhmasawnna atana CSR kaltlanga school 14 smart board a pek chu larsap hian a hlan nghal a. Smart board hmanga thingtlang lam zirlaiten hmun dang ang thoa thiamthil zirna remchang an nei thei tur chu a lawmpui tih a sawi a ni.
Larsap hian Diltlang South khuaa kangmei tuarte kawmin, PMAY hamthatna hmanga in an din leh theihnan hma la turin district bawrhsap a chah a. Governor’s Discretionary Grant kaltlangin kangmeiin a tih chhiat in neitu chhungkaw 9 hnenah puihna sumfai cheng nuai khat leh inluahtu chhungkaw 8 hnenah Rs. 5000 theuh a hlan a ni.
FMR hlihin inkalpawhna lamah harsatna siam tum lo – Larsap
