FMR tihtawp hriattirna hal dawn
Raltlan tum thawnkir leh na an ti
India leh Myanmar inkara zalen taka inkalpawh theihna tihtawp a ni chu duh loin Zo Re-Unification Organisation (ZORO) chuan he hriattirna tihchhuah copy hi a hal dawn a. Tunhnaia Bangladesh tualchhung buaina avanga Zohnahthlak raltlan tum Mizoram atanga thawn let an ni chu na an ti hle tih an sawi bawk.
ZORO Gen. Hqrs. thuchhuak chuan, India sawrkarin ram hrang hranga cheng Zofate zalen taka kan intlawhpawh theihna, Free Movement Regime (FMR) thiatin ramri kan turte tan border pass neih a tul ta a, pass neilo tan ramri kan a theih lohna dan chu 2025 January 1 atangin a kengkawh tan tih a sawi. FMR hlip a, zalen taka inkalpawh theih lohna dan kengkawh tura tihna sawrkar laipui order leh Mizoram sawrkar order chu 2025 January 29 (Nilaini) hian an hal dawn a; sawrkar laipui leh Mizoram sawrkar order hi Aizawl bakah Mizoram hmun hrang hranga hal turin ruahman a ni tih a sawi bawk.
‘Free Movement Regime tihtawp hi hlip leh turin kan ngen a, kan dikna chanvo nei let tur hian a tawp thlengin kan bei zel dawn a. ZORO hmalakna hi Zoram mipuiin thlawp turin kan ngen a ni,’ a ti.
Bangladesh rambuai avanga Bangladesh rama cheng Zohnahthlakten harsatna nasa tak tawkin, mahni sahimna zawngin Mizoram an bel a; Mizoramah thahnem tak an awm mek tih ZORO hian sawiin, ‘2025 January 5 khan Bangladesh atangin sahimna zawngin mi 28-in Mizoram an rawn lut a, Assam Rifles-in lo manin an hreng zui a. Hun engemaw chen an awm hnuah January 11 khan Mizoram sawrkar leh Assam Rifles ruahmannaa thawnkir an ni,’ a ti.
Mahni sahimna zawnga Mizoram belte thawnkir an ni chu na a ti hle tih ZORO hian sawiin, ‘Kan unaute thawnkirtu Mizoram sawrkar leh Assam Rifles hi demawm kan ti hle a. Kan unau sahimna zawnga rawn kal an awm leh a nih chuan, mahni inpui rawn bel na na na chu lo kuangkuah a, lo tuamhlawm thin tawh turin thuneitute kan ngen a ni,’ a ti.
FMR tihtawp hriattirna hal dawn Raltlan tum thawnkir leh na an ti
