FMR tinung leh turin beih tum India-in a tanna a bawhchhia – ZORO

FMR tinung leh turin beih tum
India-in a tanna a bawhchhia
– ZORO
United Nations Declaration on the Rights of Indigenous People hnuaiah ram hrana awm hnam khat chu zalen taka inkalpawh theih a ni a, he thupuan pawma vote tu zingah India pawh a tel laiin, a tanna bawhchhia in zalen taka inkalpawh theihna hi a titawp tih Zo Reunification Organisation chuan an sawi. Tinung leh turin tan lak an tum a, Zofate tanrual a ngai tih an sawi.
ZORO hruaitute chuan ramri hung leh zalen taka huamchin awma ram pahnih inkalpawh theihna – Free Movement Regime (FMR) siam hi a tirah India sawrkar bul tan niin, Myanmar sawrkarin a pawm ve leh a, chumi atang chuan ram pahnih hian tiamchin awmin FMR hi an hmang zui ta a, India sawrkar chu Myanmar sawrkar rawn loa a duhdan anga tidanglamtu zawk a nih bakah tunah tak phei chuan ram pahnih inremna thu dah a awm rih loa, an hunbi siam hnuhnung ber chu a zo tawh tih an sawi a ni.
United Nations Declaration on the Rights of Indigenous People hnuaia Article 36-ah tualchhuak hnamte, a bikin khawvel sawrkar ramri kham (international boundaary) in a thendarhte chu an inkalpawhin an intanpui anga, sakhaw thil leh khawtlang thil, ei leh bar leh politics-ah anmahni mi leh sate nen inpawha inpawlho theihna dikna chanvo an nei, tih leh, ram roreltu (sawrkar) chuan tualchhuak hnamte nena inbe rawnin he dikna chanvo tipuitling tur hian hma a la ang, tih a chuang a. UN-in he thu a ngaihtuah laia tha titu India chuan a tanna a bawhchhia tih an sawi.
FMR tihtawp a nih avang hian India sawrkar thu ang chuan, Zofate ngaihhlut Rihdil emaw Buannel emaw takngial pawh kal hleihtheih a ni ta loa, Champhai district-a awm tan lo chuan Myanmar lam luh hrim hrim pawh thil harsa tak a ni dawn ta tih ZORO hruaitute hian an sawi bawk.
Hei vang hian FMR tihnun leh a nih theihnan ZORO chuan hma a la zel dawn a, state sawrkar, tlawmngai pawl, political party leh Zofa zawng zawng tanrual erawh a ngai tih sawiin, tanrualpuiah an sawm tih an sawi a ni.
Zawhna chhangin ZORO hruaitute chuan, ramri hung leh FMR tihtawp chungchangah hian Manipur lam chu an tha a zawi rih deuh a, Nagaland nen chuan theihtawp chhuah tlan zel an tum tih an sawi a. Mizorama tlawmngai pawl lian ho chu an ngawi rih ta riau nia an hriat thu sawiin, state sawrkar pawh theih ang anga hma la turin an ngen tih an sawi a ni.