Football-a hma kan sawnna hi
Sports minister hmasa thawh
Mizo thalaite football-a hma an sawnnaah Sports minister Pu Zodintluanga’n phullem a lo phah khan kawng thui tak a sukua tih Sports minister hlui tho Robert Romawia Royte chuan a sawi a. Sawrkar hmasa hunlaia phul lem phahna football field ah FIFA standard tling lo a awm lo tih a sawi.
Thuthar thehdarhtute a kawmnaah MLA Robert Romawia Royte chuan Mizo footballer-ten phul lem phah chu state pawna an inphochhuahnaah leh eizawnna atana an hmanna kawngah an sawtpui hle tih a sawi a. Hetah hian Congress sawrkar Sports minister-in sul a lo su chu titha a tih thu a sawi a. A bikin Aizawl leh Lungleiah football player tha an chhuah tam phahna chhan nia a ngaih thu a sawi.
MNF sawrkar laiin phullem quality tha zawk phah belh nual a ni tih sawiin, Aizawl Smart City Ltd. in football field tling lo siam nual anga titi awm chu pawi tih thu leh, tuna Sports minister-in badminton court size dik lo leh football ground a tekhin chu mipui ngaihdan hruaikawi tumna mai a ni em tih ngaihtuah ngai tak a ni tih a sawi.
UD&PA hnuaia Aizawl Smart City Ltd. in football field a siamnaah a theih chin chinah nasa takin a size a tilian vek a, field tam zawkah phullem phahna senso aiin a field tih lenna senso a tam zawk hial niin Sports minister hlui hian a sawi.
“MNF sawrkar khan football field tih len hna a thawk nasa em em a. Chuti chung chuan, tlangram kan nih avangin duhthala size lian chuan field zawng zawng a siam theih loh tih hretu chu Mizo mipui kan ni. FIFA danah football field hi size chi hran hran siam theih a ni a; FIFA standard dinglai ang chuan, a field te ber chi (minimum size) chu 45×90 metre a nih laiin, a size lian ber (maximum size) chu 90×120 metre a ni. International match khelhna atan erawh a te berah 100×64 metre (Armed Veng field aia te) leh maximum-ah 110×75 metre a ni tur a ni, tih a ni,” a ti.
Hetianga football field size hrang hrang FIFA pawhin a pawm thlap lai a, Badminton World Federation-in badminton court standard size pakhat chauh a nei thung, tiin, hetiang thil intuha lo lutuk khaikhin chu Mizo mipui bum tumna leh ngaihnepna a ni em tih ngaihtuah tham a ni tih Robert Romawia hian a sawi.
Assembly House meuhah RG Stadium-a phullem phah thar chungchang chu sawrkarin a hriatpui loh leh sum pawh awm lo, contractor pawh awm lo ang hialin tuna Sport minister hian a sawi tih MNF MLA hian sawi bawkin, RG Stadium-a phullem a chhiat tawh avangin All India Football Federation-in national level competition neihnan kum 2023 atang khan a pawm ta loa, hetihlai hian Lunglei Zobawk Sports Academy atana phullem chah thlen sa chu National Green Tribunal Court-in phah chhunzawm phal loin, a hmuna phullem dah pawh la sawn turin contractor a hriattir tih a sawi.
“Khatihlaia Mizoram sawrkarin ngun taka a ngaihtuah hnuah, Zobawk Sports Academy-a phullem phah tura tih, chah thlen sa chu RG Stadium-a phullem chhe tawh thlaknan hman turin a rel thlu a. Sawrkar chuan Sports & Youth Services director hnenah sawrkar thuthlukna chiangkuang taka ziaka hrilhin, Zobawka phullem chu RG Stadium-a phah turin a hriattir a ni,” a ti.
Contractor pawhin theihtawp chhuahin RG Stadium-ah hian tha takin phullem a phah zo a. RG Stadium tan hian SASCI atangin cheng nuai 500 sanction niin, sawrkar thuthlukna angin he sum hi Zobawk Sports Academy chhunzawm a nih theih hunah phullem phahna atan hman turin a ti ta zawk niin a sawi.
“Hei hi thudik a nih lai a, phullem phah chungchanga mipui rilru hruaikawi thei tur zawnga sum sanction pawh awm lo leh, sawrkar/ MSSC hriatpui loa ti anga Sports minister-in Assembly House meuha a sawi kha a pawi ka ti a, thudik hi mipuiin an hriat ka duh a ni,” Robert Romawia Royte hian a ti.
Football-a hma kan sawnna hi Sports minister hmasa thawh
