Kar tawp khan Europe a tualchhung Leaegue lian zual panga te khelh chhunzawm a ni a, football-ah hnuhma thar engemawzat hmuh belh tur a awm. Kar tawp football a hnuhma langsar zual kan thlir kual leh thuak thuak ang.
EPL
Pathianni zan khan Arsenal chuan harsa takin Chelsea an hneh hram, point thum hlu tak an hmu. Arsenal hian an mualah bik Chelsea hi vawi nga an hneh zawnna a ni a, hei hi 1990-94 hnu lamah an mual (Home) ah a zawna vawi nga Chelsea an hneh zawn lehna hmasa ber a ni. Arsenal hi season kal meka London derby-ah a chetha viau a, London club a hmachhawn zawng zawng lakah tlawm an neih miah lo.
Manager lailawk Michael Carrick hnuaiah Manchester United an khel tha chhunzawm a, tlawm nei lovin khelh 10 chhung an kaltluang der tawh. Carrick hian manager lailawk ni chunga chak zawn rei Ole Gunnar Solskjaer record 11 chu a tluk tep tawh.
United an chetthat laiin Tottenham erawh an che chhe tluang viau thung a, khelh 10 chhung chak an nei tawh lo. Hei hi kum 30 hnua an chak loh rei ber tum a ni ta hial nghe nghe a ni.
Spanish La Liga
Inrinni zan khan Barcelona chuan an mikhual Villarreal chu 4-1 in an lo hneh. He inkhelah hian rawlthar duhawm Lamine Yamal chuan Barcelona tan a vawi khat nan hattrick a siam. Yamal hi kum 18 leh ni 230-a upa a ni a, La Liga-a hattrick siam zingah naupang lama pathumna a ni a, a chungah hian Pablo Pombo (17y-222d) leh José Iraragorri (17y-337d) te an awm. Yamal hi Barcelona tan hattrick siam thei naupang ber a ni thung a, Giovani dos Santos record a khum. Yamal hian kum La Liga-ah goal 27 a thun tling tawh a. Europe a league lian zual pangaah kum 19 tlin hmaa goal 25 chung lam thun tling hmasa ber a ni.
Yamal-a’n hattrick a siam a, a hming a chher laiin Atletico Madrid striker Julian Alvarez erawh chuan goal a thun lo ta reng thung a, a zawnin game 14 chhung zet goal a thun tawh lo. Hei hi season khata goal a thun loh zawn rei ber tum a ni nghe nghe a, hun chhe tak a hmang mek a ni.
Italian Serie A
AC Milan chu Mimual (away) ah a zawnin vawi 14 tlawm nei lovin an kaltluang tawh a, Bayern Munich tih lohah chuan Mimuala tlawm lo rei ber an ni mek.
Messi & Ronaldo
Lionel Messi chuan 4-2 a Inter Miami an hneh tumin goal hnih a thun a, a career-ah goal 898 a thun tling chiah a, goal 900 a hnaih tawh hle. Messi hian Inter Miami tan vawi 90 khelin goal 79 a thun tling der tawh.
Messi-a’n goal hnih a thun laiin Cristiano Ronaldo chuan a vawi 35 nan penalty a pet goal lo thung.
Football hnuhma langsar
