– Jipson S. Hrangate (AFC Referee)
– Jipson S. Hrangate (AFC Referee)
Kan chenna khawvel / leilung (planet/earth) chang ni lo, planet dangahte pawh hian mihring maktaduai tam tak cheng ve pawh lo ni ta ang se chu’ng mihring tam takte paw’n an ngaihsan/ngaihropui ve em em tur khawpa football pet thiam tawntaw hmingthang leh lar em em Lionel Messi-a’n football khawvel (international career) a han chawlhsan vang vang tawh mai tur hi khawvel mipui zawng zawng, a bik takin, Argentina/Messi fan-te chuan an ngaingam thlawt lo a, an la phal lul lo a, an khuate a har a, pawi tia kimkiin an chek tlawk tlawk mai zawng a nih hi maw!
‘Tiang khawpa football khel mawi leh thiam chungchuang (extraordinary) Messi-a ball khelh kan han hmu ta lo (missed) mai tur hi chu rilru a nain, hril a hai khawp mai… mahse, hun kal zel leh tui lian luang lai ang maiin Messi thuthlukna chu dan zawh rual a ni si lo, a fan-te’n an la uizia leh thlakhlelhziate chu ngaipawimawh hle mah se a football khawvel chu a lo thlahliam ta tho a ni.
Mipui (fans)-te duh dan leh beisei dan chuan (amah Messi-a duh dan leh beisei dan pawh a ni ta ve ang) tun tuma WC 2026-ah tal khan championship nopui la han dawm leh se, ti chuan, a fan-te zawng zawng leh Messi ngei pawh hlim leh lawmin an phur lehzual ang a, chumi chuan Messi pawh a rawn tichak lehzual sauh ang a, tha thar rawn chhuah lehin WC lehpek 2030 pawh a la play thei tur hi a nia.
Dik tak chuan Messi hi upa teh chiam pawh a la ni lo a, WC lehpek 2030-ah khian kum 43 chauh a la ni dawn a, hlim leh lawm leh phur tharnain chakna thar rawn pein WC squad-ah a la tel ve thei ngei ang maw le…
Tin, an coach Scaloni pawhin Messi chu a la thlauthla mai phal hauh lo ang. Kan hriat theuh tur chu WC football star hranghluite kha han chhuilet ila – Roger Milla (Cameroon, Italia 90); Peter Shilton(England, Italia 90); Essam Hadari (Saudi Arabia, Russia 2018) etc. te pawh kha kum 40, 41, 45-a upa an nih tawh hnu pawhin WC an la khel thei tho a nih kha!
Chuvang chuan, Messi pawh a football thiamna (skill & tactics) thuk tak leh sang tak mai hmangtangkaiin kum 43-ah pawh WC 2030 a la khel thei awm em mai tih chu khawvel mipui beisei leh ngaihdan a ni.
Mahse, Messi leh a fan-te beiseina WC winner chu 2026 WC final result 1-0 khan a rawn thaichhia (scatter) ta rup mai a nih kha. WC 2026 final match hma leh final khan Messi leh Argentina fan-te rilruah nghawng (impact) a nei seiin a nei thuk hle tih chu kan hriat theuh tawh kha. A tawi thei ang berin han thlirlet lawk ila.
Argentina team khan tun tum WC 2026-ah khan a bul atanga semi-final thleng an khingpuite an hneh vek a, hemi chhung zawng hian thu chhia leh tha (ups & downs) an hmachhawn reng a, an play zawng zawngah khan Messi thiamna an chhawrtangkaiin an hlawkpui hle bawk.
Semi-final match ropui taka an rival lian ber England pawh Messi thiamna zar bawka 2-1-a an han hneh leh kiha khawvel pumpui chu Argentina fan-ho hnehna hlado chham chuan a nghawr nghing nasa hle a nih kha.
Chu chang a ni lo, Argentina fans hlim/lawm luat vanga an poster rawn thehchhuah ‘Las Malvinas Son Argentinas’ (Falkland thliarkiar hi Argentina ta a la ni reng) tih inziak chuan England-ho leh a behbawm ramte (United Kingdom) rilru chu feia chhun ang maiin a tina hle a, nghawng a nei sei hle thung. Hemi vanga boruak chhia virvet/vuakvet vel chuan Argentina mipui/fans leh team-te rilru leh taksa a zembuai hneh em em a, United Kingdom nawr/turna avangin FIFA-in Argentina chu FIFA Discplinary Action Article 13 2( C) hmangin a han hremzui leh nghal!
He’ng bakah hian thubuai dang dangin a han chhilh zui leh nghal chu Argentina fans leh team-te phur chu a rit ta em em a, an phur zo thlawt lo a, an tlukpui ta tawp mai a nih kha!
An tan chuan pangpar mawi pawh a mawi zo ta lo a ni ber e!
Khati ang boruak chhe em em hip reng chunga WC final han play hram hram a tul tlat kha chu Messi leh a hote tan khan a phurawmloh teh mai a nih kha maw le!
An tan chuan WC trophy rangkachak hlang mawi zet mai han dawm leh pawh chu a thlakhelhawm lo rum rum mai bawk a nih kha!
A eng pawh chu ni se ‘phengphelepa khau a tlai zo ta’ an tih ang maiin engkim mai hi Argentina fans leh Messi tan chuan a nih tur tur a ni zo ta. World Cup no mawi dawm nawn (a zawna champion hi) thil harsa tak a nih vei nen, Messi-a’n 2026 WC no mawi a han hloh ta mai kha a tan chuan van pui chim ang mai a lo ni ta a, chuvang chuan a football khawvel a chawlhsan pawh hi thil awm tak a ni reng a ni.
Tu WC team pawh hi a zawna champion an la vang khawp mai! Brazil leh Italy tih lo chu…
Brazil-ho kha Pele thiamna hmangin WC 1958-1962 kha a zawnin an lo la tawh a; Italy-in Giuseppe Meazza thiamna hmang bawkin WC 1934-1938 kha a zawnin an lo la (win) tawh bawk.
Messi leh fan-te beiseina lian ber a zawna champion chu vana rah ang mai a lo nih tak si avangin tunah leh hma lama fan-ho beiseina sang ber chu engtik niah emaw chuan Messi coach-na hnuaia Argentina team chu WC champion ni a la rawn herchhuak mahna tia duh ai sam chung zelin tlumte thlirin kan lo thlir reng ang e…
Messi hian a football khawvel (international match) chawlhsan a puan hnu August ni 31, 2026 atanga vawiin thleng hian Messi fan-te chu Messi-a ball khel hmu leh chakin an la dak fan reng a, chutih lai tak chuan tunlaia FIFA-in internatonal friendly match (Argentina vs Benin) a rawn buatsaih hi vanneihthlak tiin Argentina Football Association (AFA) chuan Messi international match khelh hnuhnung ber leh Messi farewell-na atan a hmangtangkai ta hlauh a; date 7-10-2026 zing lam dar 4:30 atanga khan Argentina khawpui Buenos Aires-a Estadio Monumental Stadium, mipui 85,000 chuang zet thut theihna hmunah chuan Messi farewell match & ceremony chu ropui taka hman a lo ni ta.
Match khelh hma hian Argentine singer hlun Fabio Santana-a’n Argentina national anthem a han sa meuh chuan Argentina mipui leh players, coach-ho biangah mittui a nawrchhuak hial a, Messi meuh pawh a insum zo bik lo.
Ti chuan, kick off dawnah pawh an khingpui Benin team chuan Messi-a thlah (farewell)-na’n trophy mawi tak leh an ram team jersey an present bawk.
Play laklawh lai tak (10th min)-ah inkhel chu chawllailawktir lawk (timeout) a ni a, stadium chhunga mipui awm zawng zawngte chu Messi thlahliamna’n an ding vek a, Benin players leh Argentina player-ho zawng zawngin Messi thlahliamna chibai an buk siau siau mai chu Messi-a’n lawm takin a lo dawngsawng a, a mawi khawp mai.
Play chhung hian Messi a thiamzia leh tactics fuhzia chu a la lang chiang hle a, goal hnih zet mai chu Messi assist-na vang liau liauin Otamendi leh Nico Paz-te’n an score phah a, amah Messi ngeiin goal khat penalty atangin a score bawk.
Otamendi pawh hi WC 2026 final zawh khan football khawvel a lo chawlhsan ve ta. Nico Paz-a hi ball khelh thiam tak mai a ni a, Messi-a number 10 rawn rochung tur a ni nghe nghe. Khawvelin amah atangin beiseina an nei sang hle bawk. Messi pawhin a chhuang hle.
Half time-ah chuan amah ngaisangtu rock singer Gasper Banegas-a’n mawi takin zai hla remin a awi bawk.
Inkhel zawhah chuan stadium chung leh Buenos Aires khawpui mipui zawng zawng hmuh phak turin Messi number 10 leh a ma lim (potrait)-te chu mawi takin an pholang a, khawvel mipui mit a tlai hle.
Stadium ground chhungah Argentina nu zaithiam tak mai Soledad Pastorutti chuan uluk leh mawi takin Messi thlahna hla a sa a, Messi-a’n a va hnaihchilh reng bawk nen…
Ti chuan, Messi-a’n titak fahrana Argentina fan-te a thlahna’n farewell speech a han nei chuan amah ngaisangtute zawng zawng mittui a nawrchhuak lo thei lo.
Messi hi interview leh TV vela a lan reng reng hian thu tam sawi duah chi ni lo mah se tuntum zet hi chu a luangliam ve takzet tih a hriat theih a, a mangthana thuchah kha a chipuite leh khawvel puma amah ngaisangtute tan tlang chunga Lal Isua thusawi tluk zetin a hlu awm e…
Messi chanchin tawi
Messi hi June ni 24, 1987 khan Argentina rama Rosario khuaah a lo piang a; kum 4 mi a nih atangin an veng football club Grandoli-ah a khel tan a, kum 7 mi a lo nih chuan Newells Old Boys club-ah a play leh a; chumi club tan chuan goal 500 lai a thun hman a ni.
Kum 2000 khan kum 13 mi niin Barcelona-ah a lut a; a football career chhunga club lar tak tak a telnate chu Barcelona, Paris Saint Germain leh Inter Miami-te an ni.
World Cup football hi kum 19 mi niin 2006 khan an ram Argentina tan a khel tan a; 2014, 2022 leh 2026 khan a ram chu WC final a thlenpui a, kum 2022-in a champion-pui a, kum 2014 leh 2026 ah runners-up a thlen pui bawk.
A football career chhung hian goal 930 a score hman a, nimin tuka Benin laka a thun nen chuan 931 a tling pha ta.
Khawvel football pet thiam nena inzawma lawmman chi hrang hrang dawn chi zawng zawngte chu a dawng kim vek tih theih hial a ni. A lawmman dawn hi 200 chuang zet a tling phak a, a pawimawh zual kan an tarlang ang e :-
(i) Ballon d’Or – vawi riat (khawvel record a break)
(ii| FIFA Player of the Year/The Best FIFA men’s Player Award – vawi riat
(iii) European Golden Shoe – vawi ruk
(iv) World CUP Golden Ball – vawi hnih (2014&2022)
Tin, he’ng trophy bakah hian football nena inzawma record tamtak a break bawk. Chu’ng te chu :-
(i) World Cup match khel hnem ber (2006 – 2026 chhung hian WC vawi ruk khelin, match 34 a khel a, chu chu khawvela a ber a tling var var)
(ii) Khawvela WC khel rei ber (minute 3055)
(iii) World Cup match chak hnem ber (23 matches)
(iv) Argentina tana goal khung hnem ber (126 goals)
(v) Conmebol qualifiers all time leading scorer with 36 goals
He’ngte bakah hian achievement tam tak a nei bawk, a vaiin kan sawi seng lo ang. Khawvela football pet thiamte zinga a ropui ber chu Messi hi a ni tih hi khawvel mipuite pawm dan a ni.
Messi ball pet thiamna danglam biknate :-
(i) A ball khelh (display) a mawi bik em em.
(II) A goal shot a chiangkuang thei hle (great accuracy).
(iii) A ball supply (assist)-te a dik thlap thlap a, chu chuan a teammate-te tan goal scoring chance ropui tak a siam thin.
(iv) Dribbling (opponent-te bumkawi) a thiam hle a, opponent defence line-ah pawh player 3/4 a bum kawi chiam thei.
(v) Free kick a thiam hle bawk a, a career chhung hian free kick goal 76 zet a score tawh.
(vi) A ball skill leh tactics hi a class a sangin a ril hle bawk a, ball a chan tawh chuan play kal dan a danglam mai a ni.
(vii) Ball a control zo (possessive) hle a, a ball control chu a opponent-te’n an chhuhsak thei zen zen lo, amah an foul khum a nih ngawt lo chuan.
(viii) Game spirit a nei hle a, a selfish lo bawk a, a teammate-te tan ball mawi takina siamsak thin.
(ix) A zaidam hle a, a teammate-te zingah remna siamtu a ni fo thin.
(x) A fan-te a ngainalet (response) thiam em em a; eg: Afghanistan rama Messi jersey (number 10) polythene thuichawp hmanga hatu naupang chu an ramah a han pan ngat a, jersey leh tanpuina sum leh pai tam tak a han pe bawk.
ADIOS A LA CAREERA FUTBOLISTA DE MESSI…
MESSI FOOTBALL KHAWVEL…
DAM TAKIN MANGTHA LE !!