Football khawvelin De Miguel a sun…
Thawhtanni zan Spanish second division match pakhata FC Andorra nen an inkhelh tum khelmuala tluhlum ta Tenerife striker Jesus de Miguel kha football khawvelin a sun na khawp mai a, Thawhlehni leh nizan Champions League match tin khelh tan hmain stadium chhungah sunna hun hman a ni.
Andorra goalkeeper Jesus Owono nen ball kang inchuha na taka an intauh rualin De Miguel kha khelmualah a hlawm thla hnawk a, rei vak loah zal nghal derin, a lu leh awma lehlam goalkeeper nen an intauhna hliam chu damdawi in lamah enkawl zui a ni a; a dinhmun a ngialnghet tih an puan hnu lawk Thawhlehni zingah Spaniard hi a hliam tuarchhuak zo loin a kal zui ta mai a ni!
Thawhlehni zan Europe khawmualpuia Champions League match zawng zawngah a sunna’n minute khat chhung stadium tina mite ngawi rengin minute khat chhung an ding a; nizan Champions League fixture bakah Europa League leh Conference League match zawng zawngah De Miguel sunna hun hi hman chhunzawm leh a ni.
Tenerife home ground-ah Estadio Heliodoro Rodriguez Lopez-ah De Migue-a black and white thlalak tarchhuah nghal niin, a kiangah a suntute’n bati chhiin, pangpar an dah ruih ruih a.
Thawhlehni khan Tenerife chuan thuchhuah siam nghalin, an striker chu ni ruk chhung official-a sun tur a nih rualin hetih chhung hian club thiltih reng reng chawlhsan vek tur a nih thu an tarlang tel.
Navahermosa, Toledo-a vuina hunah a khelhna club player, staff leh official zawng zawng tel turin thuchhuah an siam bawk.
Tenerife hian kartawp Inrinni zanah an home ground hawngin, supporter-te tan an player thlahna hun an siam bawk dawn a ni.
Club thuchhuah chuan, “He hun rapthlak an tawh mek laia an thinlung chhungril ber atanga sunpuitu leh thlawp tlattute zawng zawng chungah Jesus de Miguel chhungtew chuan lawmthu an sawi a, an privacy erawh zahsak turin an ngen nghal a ni. Muangin chawl rawh se,” an ti.
Tenerife federation of supporters’ clubs president Fran Leon chuan, “He thihna chanchin kan hria hi kan tliak hnawp a ni ber a, he thliarkar mite zawng zawng hian kan sun a, Canarias zawng zawng kan rum a, he natna hi kan intawm vek a ni,” a ti.
Aston Villa an hneh tuma goal hnih a thun zawhah Barcelona Brazilian forward Raphinha pawhin, “Vawiin zet chu football chungchang sawi pawh ka duh lo. Jesus-a chhungte ka tawrhpui a, chak taka awm turin ka duh a ni.”
Arsenal boss Mikel Arteta pawhin news conference a hmachhawn tumin thil thleng kha thinlung kehsawm vekna thlentu a nih thu leh a thawhpuite ngei khati anga mual an liam lai hmuh kha tawngkaa sawifiah ngaihna awm lo chanchin lungchhiatthlak a nih thu a sawi.
Sports star dang langsar zingah Spanish tennis icon Rafael Nadal, Argentine great Lionel Messi leh Portugal legend Cristiano Ronaldo-te pawhin Instagram lamah sunna leh tawrhpuina thuchah an tichhuak ve bawk.
Inter Miami forward Messi chuan thi chhungte leh thiante tan chakna a dilsan rualin kha vanduaina kha sawi ngaihna awm lo tiin a ziak a; Nadal pawhin lungngaihna runthlak tia sawiin, a thinlung chhungril ber atanga a tawrhpui thu a tarlang.
Chuti ang tho chuan Ronaldo pawhin chhiatna leh sawi ngaihna awm lo a nih thu tarlang chungin De Miguel-a chhungte a tawrhpui a, chak taka awm tura duhsakna a hlan ve bawk.
Barcelona defender hlui Gerard Pique kha Andorra club neitu pakhat niin, ani pawhin a thlarau zawng zawng nen pawi a tih thu a ziak a; De Miguel-a Tenerife team-mate zawng zawng pawhin social media-ah uina leh sunna an dah chhuak vek bawk.
Thawhlehni zan Champions League match pakhata Spanish club Villareal leh Paris St-Germain intum tumin fans lamin ‘DEP’ tih thuziak an tarchhuak a, chu chu ‘descanse en paz’ tihna niin, sap tawng chuan ‘rest in peace’ tihna a ni.
Real Madrid manager Jose Mourinho pawh tawng chhuak tawhin, pawi a tih thu leh a bik takin amah leh nitin khelmuala inelna hmachhawn thin zawng zawngte a barakhaih zual niin a sawi a, De Miguel suhlumtu Equatoguinean goalkeeper Owono tan hun khirhkhan tak a nihna a hriatthiampui thu a tarlang tel.
Chawlhlawk hma minute sarih la awma team pahnih 2-2-a an la inhnehtawk laia long ball thenfai tuma centre rinbial chhung thlenga rawn tlanchhuak Andorra keeper Owono chuan ball lak tuma lo chang De Miguel kha a khupin a do ngheng niin a lang!
Tenerife srtiker kha khelmualah che lo chang loin a tlu a, ambulance hmanga hospital an panpui hmain medical staff lamin an bawisawm zawk a; team pahnih player-te an hrilhhai hle a, De Miguel team-mate thenkhat chu an mittui a tla hial a ni.
Referee khan Owono kha straight red card pein inkhel a titawp zui ta bawk.
Thihna thlentu goalkeeper khan follower 30,000 chuang a neihna Instagram account chu Thawhlehjni zing khan a titawp (deactivate) nghal a ni!
Thawhlehnia Reuters tarlan danin, Spain ram police-te chuan De Miguel-a thihna chungchangah khan tihluih ve reng a ni em tih chhuina an kalpui nghal a ni.
Spanish dan hnaiah thihna pangngai lo ang chi reng reng chu dan hnuaia chhuina kalpui nghal zel tur tih a nih laiin police lamin thil thlen dan han chhuichiang ve bawk mah se Santa Cruz de Tenerife chief prosecutor Jose Luis Sanchez-Jauregui chuan Spanish news agency EFE hnenah criminal case ziahluh a nih a rinawm loh thu a hrilh.
De Miguel hian nikum nipui thawt lai khan Castellon chhuahsanin Tenerife hi kum thum chhung atan a zawm a, season khat lek a cham hman tihah a team thar chu second division-ah a kai chhohpui a, a heti zui leh ta mai a ni!
Spanish forward hian Madrid khawpui daifema inkulh Leganes youth level-ah a career bul tanin, kum 2023-a Castellon a zawm hma khan team engemawzat tan a khel hman a, chu’ng zingah chuan Unionistas de Salamanca a tel.
Football khawvelin De Miguel a sun…
