Footballer ropui ber Lionel Messi

Football huanga player tha ber chungchangah inhnialna tawp hleithei lo a awm reng thin. Pele leh Maradona chungchangah inhnialna a tawp thei lo va, anni pahnih hi ‘Player of the Century’ ah thlan an ni dun hial. Pele leh Maradona chungchangah inhnialna tawp thei lo a awm hnuin Lionel Messi leh Cristiano Ronaldo inkarah inhnialna tawp thei lo a awm zui ve leh. Messi leh Ronaldo te hi World Cup a la champion lo ve ve an nih laiin World Cup a champion zawk zawk hi ropui zawk tura ngaih an ni thin. World Cup ah Lionel Messi a champion tak av^ngin inhnialna a tawp ta a, footballer ropui ber; G.O.A.T (Greatess of All Time) chu Lionel Messi a ni.
Thil pek hlu thiamna
June 24, 1987 a piang Lionel Andrés Messi hi Pathianin football thiamna a pek bik nia ngaih a ni a. A pumrua lian lo mah se thiamna thil thlawn pek hlu tak dawng a nih miau av^ngin football thiam chungchuang bik a ni tho thung.
Messi elpui lian ber Cristiano Ronaldo hian footballer tha ni tura mamawh ang zawng zawng a nei kim veka ngaih a ni. Ronaldo hi a pumrua a lian a, thahrui a ngah a, a tl^n chak bawk. Messi erawh chu chutiang chu a ni lo; a t> a, thahrui a ngah lo va, tl^n chak tia sawi tur a ni hek lo. Chuti chunga footballer ropui ber a ni thei hi a mak a, Pathian thil thlawn pek dawng a nih miau vangin a mak lo thung.
Barcelona mit a var
|han theih lohna hriin a tihbuai Messi hian a naupan laiin Argentina tualchhung club Grandoli leh Newell’s Old Boys tan a khel ve lawp lawp thin a. Newell’s Old Boys tan hian goal 500 a thun tling hman tep niin an sawi thin. Newell’s Old Boys tan a khelh lai hian natna khirh tak Growth hormone deficiency-in a tlakbuak a. A natna enkawl nan hian thla tin US Dollar 1,000 an sen ziah a ngai a, hei hi an chhungkaw khawsakin a tlin lo. Argentina rama club lian River Plate pawhin awt viau mahse hri vei enkawlna tur sum pek an huam loh vangin an la lut thei lo. Argentina lamah an beidawn hnuin beiseina sang tak nen Spain an pan a, Barcelona an bel bul.
Ball thiam bik Lionel Messi chungah Catalan club lian FC Barcelona mit a var a, thil thui tak an hmu. Barcelona first team coach Charly Rexach chuan Messi thiamzia hriain rang taka lak luh nghal a duh laiin an club Director erawh chuan ram dang mi, kum naupangte ni bawk si lak luh chu a lo hreh ve hle thung. A thiamzia hrechiangtu Rexach nawrna nasa tak vangin Barcelona hian an la lut ta nge nge a. Kum 2000 khan, kum 13 mi lek niin football academy tha ber pawla ngaih La Masia-ah awmze nei zawkin football a zir chho a. Xavi, Iniesta leh Fabrecas te nen football an zir hova, nasa taka a thiamna tihpuna awmin Barcelona rawlthar team tan a che tha chho hle. Kum 2004 atang khan Barcelona senior team tan a khel tan a.
Barcelona tan a khelh chhung hian club anga champion theihna zawng zawngah an champion kim a. La Liga- ah vawi 10, Copa del Rey-ah vawi 7, UEFA Champions League-ah vawi 4 an champion a. Barcelona hi UEFA Super Cup leh FIFA Club World Cup-ah vawi hnih ve ve a champion pui bawk. Barcelona tan hian inelna hrang hrangah vawi 778 a khel a, goal 672 zet a thun.
A in ang maia a tlangnelna Nou Camp-ah kum 17 zet a cham hnuin kum 2021 khan French Ligue 1 club lian Paris St-Germain a zawm.
Barcelona a chhuahsan hnu hian PSG chu French Ligue 1-ah an champion zui nghal bawk a. Club tan trophy lak theih zawng zawng a lak tawh bakah, mimal chawimawina dawn theih ang ang a dawng kim tawh bawk.
Paris St-Germain-ah contract a hman zawh hnuin a ropuina Barcelona-ah kir leh theihna hun tha a nei a. Saudi Arabia club hausa tak tak ten khawvela infiammi hlawh hnem ber ni turin an sawm bawk. Sawmna duhawm tak tak a dawnte hnawlin Major League Soccer club Inter Miami a pan. A lung tileng em emtu Barcelona lamah let leh se player thenkhat an chhuah a ngai dawn a. |henkhatin an hlawh an tihhniam a ngai dawn bawk. Amah vanga player dangin a tuar tur chu a ngai ngam lova, ngai chung zelin Barca a hnar. Saudi Pro-League club pan se hausak belh hluai tur a ni naa nupui fanaute nen hahdam leh hlim tlang taka hun hman a thlakthlelh vangin Inter Miami a pan ta zawk. Footballer ropui David Beckham-a club Inter Miami-ah hian bul a tan tha viau a, USA-ah player ropui bik a nihzia a lantir zui leh nghal zat.
Argentina fa duat
Messi hian kum 2004 atang khan Argentina Under 20 tan a khel tan a. Kum 2005 khan U20 World Cup-ah Argentina a champion pui a. Kum 2008 khan Olympic ah Argentina champion puiin, Olympic Gold Medal a dawng leh bawk. Argentina senior team tan kum 2005 atangin a khel tan a. Tun thlengin Argentina tan hian vawi 187 a khel tawh a, ram tan goal 109 a thun tling tawh.
South America khawmual inelna ‘Copa America’ leh khawvela inelna ngaihhlut hlawh ber FIFA World Cup ah Argentina tan inlanin final thlen chang nei thin mah se hlawhtlinna an chang thei mai lo. Barcelona-ah a chet ropui anga Argentina tan a chet ropui thin loh av^ngin Messi hian sawisel pawh a t^wk nasa thin viau. Argentina hi hlawhtlinna a chanpui mai theih loh av^nga beidawngin ram tan inkhelh chawlhsan hman rum rum mah se a kir leh a, Argentina ropuina ni a nghakchhuak ta nge nge.
Copa America 2021 final-ah a thlengtu Brazil hnehin an champion ta nawlh a. Copa America 2021 a champion puitu manager Lionel Scaloni hnuaiah champion an thiam thar. June 1, 2022 khan a vawi khat nan European champion leh South America champion te trophy an inchuhna tur Finalissima buatsaih a ni a. Khelmual ropui Wembley Stadium-ah South America champion Argentina chuan si thum fai ngawtin European champion Italy an sawp. Messi chuan Finalissima-ah Argentina a champion pui leh ta.
Finalissima khelh a nih hma hian ‘South America player ten ball an thiam zawk’ tih leh ‘Europe player ten ball an thiam zawk’ tiin football a tawnhriat nghah tak takte an inhnial chiam a. He inhnialna hian player te pawh a kangkai hial. He inhnialna hian Finalissima boruak a tilian zui ta viau nghe nghe a. Argentina hian ‘Europe player te an thiam zawk’ ti tute ka an hup chiang hle.
Inelna lian pahnihnaah an champion hnuin World Cup 2022 -ah Argentina chu ropui takin an champion zui leh ta. World Cup-ah meuh an champion leh tak av^ngin Messi hian ropui ber ni tura a mamawh ang zawng zawng chu a nei kima ngaih a ni nghal a. Video games ang maiin ‘Messi hian football a thlengchhuak ‘ tiin sawi zui a ni ta a ni.
Copa America 2021, Finalissima 2021 leh Fifa World Cup 2022 ah Argentina a champion pui hnuin Messi hian a la duh tawk mai lo. Copa America 2024-ah ropui takin an champion nawn leh a, Argentina hi Copa America-ah vawi 16 an champion a, champion ngun ber record thar an siam. Copa America-ah hian champion ngun ber chu vawi 15 champion tawh Uruguay an ni reng thin a. Inelna hnuhnung pahnihah an champion zawn vangin Argentina in Uruguay record an khum a, champion ngun ber an ni ta a ni. Copa America 2024-ah an champion leh tak vangin Messi hian trophy 44 a chawi tling chiah a, footballer zingah trophy chawi hnem ber a nihna a tih zau belh bawk.
Mimal chawimawina
Club leh ram tan champion theihna zawng zawnga champion kim tawh Lionel Messi hian footballer chawimawina ngaihhlut hlawh ber ‘Ballon d’Or’ vawi riat ngawt a dawng tawh a, Ballon d’Or dawng ngun ber a ni mek. Inelna ngaihhlut lawh ber FIFA World Cup-ah Best Player vawi hnih ni tawhin World Cup-a best player tumhnih ni thei awmchhun a ni a. FIFA World Player of the Year chawimawina vawi khat a dawn tawh bakah FIFA Men’s Player of the year-ah vawi thum thlan a ni tawh bawk.
Messi hi goal thun thei tak a nih vangin European Golden Shoe vawi ruk a dawng tawh a. Pichichi Trophy (La Liga top scorer) vawi riat a dawng tawh bawk. La Liga-ah hian ‘Best player’ ah vawi ruk ngawt thlan a ni a. Argentine Footballer of the Year vawi 16 zet a ni tawh bawk. Footballer zingah a hmasa ber ni turin Laureus World Sports Award for Sportsman of the Year 2023 a dawng bawk a. Hei hi football-a Messi chungchuanzia tifiahtu pakhat a ni.
GOAT a ni em?
A champion tawhna hrang hrang leh mimal chawimawina a dawn tawh hrang hrang atanga tehin Messi hi Greatest of All Time (GOAT) nih phu a ni a. GOAT a nih thu si sawi a inthlahrunawm loh viau niin a lang.
Messi hian Under 20 World Cup, Olympic, Copa America, Finalissima leh World Cup-ah te Argentina a champion pui kim tak vangin Messi hian club tan a thawh that ang bawkin ram tan a thawk tha a. Argentina ropui thar leh nana player pawimawh ber a nih av^ngin Maradona ang thova ngainat hlawh leh ngaih ropui a ni kumkhua tawh ang.
Zep thu a cheng lo, Lionel Messi elpui lian ber chu Cristiano Ronaldo a ni. Ronaldo hian ram tan goal 130 a thun tling tawh a, footballer zingah ram tan goal thun hnem ber a ni mek. Inelna ngaihhlut hlawh tak UEFA champions league-ah goal thun ber a ni a, Euro-ah goal 14 thunin goal thun hnem ber a ni bawk. Club anga trophy lak theih ang zawng zawng a la kim tawh a. Portugal hi Euro 2016-ah a champion pui bawk. Ronaldo hian Ballon d’Or vawi nga ngawt dawng tawhin, FIFA World Player of the Year-ah vawi khat thlan a ni a, Best FIFA Men’s Player-ah vawi hnih thlan a ni tawh bawk.
Ronaldo hian mimal record ropui tak tak nei bawk mah se Messi chunga dah a nih theih loh chhan chu inelna ngaihhlut hlawh ber FIFA World Cup-ah la champion ve tlat lo hi a ni. World Cup-ah champion pawh ni se Olympic Gold Medal a dawng ve lo leh Age level inelna lianah Portugal a champion pui ve lo hi Messi hnuaia a awm chhan tur a tling tho in a rinawm.
Club leh ram tan hlawhtlinna hrang hrang a chan tawh zozai te, mimal chawimawina a dawn tawh zozaite atanga tehin Lionel Messi hi footballer ropui ber tih loh rual a ni lo. Footballer ropui ber thlang tur hian tu emaw tantu emaw, tu emaw tan lotu nih a ngai lova, an record en tur a awm a, chuta tanga teh mai tur chu niin a lang. Footballer ropui ber chungchanga inhnialna awm reng thin chu tihtawp theih a ni ta nge nge a. Ropui ber chu Messi a ni. GOAT MESSI!