Mizoram Legislative Assembly pariatna session 12-na nimina neihah, environment, forest & climate change minister-in, tunhnaia parliament-a dan siam thar – Forest Conservation (Amendment) Act, 2023 dodalna official resolution “That this House unanimously resolves to oppose the Forest Conservation (Amendment) Act, 2023 in order to protect the rights and interests of the people of Mizoram” tih a putluh chu pawm a ni a. Mipui aiawha roreltuten ‘kan dodal’ tia thutlukna an siam chu, ‘Mizoram mipuiin kan dodal’ tihna a ni.
Mizoram tana Forest dan thar that loh dan hi chu mipui nawlpui pawhin kan hre bel viau tawh awm e. Hetih lai hian, India Danpui Part XXI-a Mizoram tana Special Provision 371G hian he dan thar lak atang hian min humhim thei dawn em tih chu hunin a la rawn hril tur nia ngaih theihin a awm a. A chhan pawh, nimin session-a he official resolution sawiho a nih lai khan, ‘keini Mizoram hi chu he forest dan thar lakah hian special provision 371G hian min hum alawm, ngaih tha takin a awm theih e’ tia chiang fek fawka sawichhuah thawm hriat tur a awm lo niin a lang. 371G-a ‘ownership and transfer of land’ tih hian ‘forest’ a huam tel dawn nge dawn lo tihah kan chiang ngam zan lo niin a ngaih theih bawk.
India Dan pui Part XXI hnuaiah hian state thenkhat tan special provision siam a ni a, chung zingah chuan Nagaland leh Mizoram hi thui tak a inang a. 371G-ah chuan heti hian dah a ni a: Special provision with respect to the State of Mizoram.
Notwithstanding anything in this Constitution, (a) no Act of Parliament in respect of—
(i) religious or social practices of the Mizos,
(ii) Mizo customary law and procedure,
(iii) administration of civil and criminal justice involving decisions according to Mizo customary law,
(iv) ownership and transfer of land, shall apply to the State of Mizoram unless the Legislative Assembly of the State of Mizoram by a resolution so decides: tiin.
Hetah hian Nagaland nena kan danglamna chu (iv) ah hian a ni a; Nagaland-ah chuan – (iv) ownership and transfer of land and its resources, tih a ni a, resources tih hi Mizoramah chuan a awm ve ta lo a ni.
Land hian interpretation hrang hrang a nei thei a, kan special provision-ah hian resources lo tel ta lo a nih pawhin, ‘land’ tih chuan natural resource heng – lei hnuai leh a chunga thil hlu, lui tui, dil, thing leh hnim hring, tlang leh phaizawl engkim mai hi a huam tel a… tia tan kan khawh ve tlat a pawimawh dawn ta niin a lang.
Forest Act vrs 371G
