Forest department hnuaia ram humhalh a nih avanga Vairengte – Sairang inkar four lane sial tura harsatna a awm reng hnu ah tunah hma lak tan mek a ni a. Buaina bulpui Forest department leh helaia ram neitu nia insawiten ram laksan man an la ve ve dawn. Sawrlar laipui ruahmanna, Bharatmala Pariyojna hnuaia four lane siam tur hian Mizoram chinah a tam zawk hi Kolasib district a paltlang a. Package 3, 4, 5, 6 leh 7 hian Kolasib district paltlang vekin, Vairengte leh Sairang inkar kawng thui zawng hi km. 111 a ni. Tuna kawng thar siam tum hi km. 90.25 a ni. Kawng kal dan tur ruahmanna hi siamfel tawh niin, Mualkhanga lei metre 500 chu lei dawh zinga sei ber tur a ni a, lui luang tibuai lo tur ang berin ruahman a ni a, kawngsira thing phun dan tur ruahman tel a ni. Leivung dahkhawmna tur engemawzat endik a ni a, lirthei lian tana zawh nuam tura zala siam tum a ni.
Hetihlai hian Mizoram Forest department atangin kawng zauhna tur hian reserved forest leh riverine reserved forest hnuaia awm tam tak a suchhe dawn nia sawiin, forest clearance a pe thei loa; helai hmunah vek hian mimal tam takin Land Revenue & Settlement hnuaiah ‘ram’ an lo nei bawk a, zangnadawmna pek hleihtheih lohin kum 5 vel a riral hman nia sawi a ni.
Chief minister Lalduhoma chuan nikum October-a sawrkar laipui hotute a dawrnaah, ram nei inti mimal ho leh Forest department hnenah hian zangnadawmna pek ve ve mai a rawt tih a lo sawi tawh a. Net present value angin Forest department lam chan tur hi cheng vaibelchhe 90 vel, ram neitute chan tur hi vbch. 1100 vel nia sawiin, hei hi sawrkar laipui hian a hnu ah a pawmpui ta niin a sawi. An zawhchianin, India ramah hmun dangah hetianga zangnadawmna pek kawp hi a la awm ngai lo niin a sawi bawk.
He hmalakna hnuaiah hian kumin January atang khan Vairengte – Sairang four lane siam tur hian package 5 leh 7 hnuaiah hna thawh tan a ni tih chief minister hian a sawi a. “Zangnadawmna lama harsatna avanga hna chawlhsan tawh, a thawktute pawhin inhnuhdawh san mai an duh rum rum tawh chu, kan dil angin sawrkar laipuiin zangnadawmna min pek a remti a, package 5 leh 7 ah thla hmasa (January) atang khan hma lak chhunzawm a ni leh tawh,” a ti.
Hetihlai hian chief minister Lalduhoma chuan Mizoram leh Manipur inkalpawhna Tuivai lei dawh zawh a ni chu lawmawm a tih thu a sawi a. Sawrkarna an chan hnua Manipur unau harsatna tawk mekten mamawh an thlen hmasak ber chu Tuivai lei dawh a ni, tiin, a hmunah a tlawh hnu ah feet 200-a thui Bailey bridge dawh turin hma an la nghal tih a sawi a ni.
Forest clearance fel theih loh vanga hma lak theih loh four-lane sial tan
