FOREST DEPTT HIAN PAWISA AN NGAH VIAU EM NI? AWARD NUAI 2 CHHAWMTIR AN NEI A

Ruatfela Nu
Kum eng nge maw zat liam tawhah khan ‘Cheap Award’ tih article ka ziak a. Ka ziak chhan chu—Sawkar hna sâng tak thawk, (a retired-na a rei tawh) ka ngaihsan deuh nen ka ward hnawl chungchang kan sawi dun a. Eng emawti laia vai rama vai pawl phuah chawp deuh deuhin, Mizorama sawrkar hna sâng thawk leh kawng hrang hranga mi larte award an offer pawma dawng an awm nual thin kha upa lam deuh chuan kan la hre hlawm ang a, tun lai hian an ching tawh lo niin a lang.
Ka Pi chuan chung award chu a lo dawng ve a, Mumbai-ah a fanu hruaiin a zu dawng a, “Award semna hall te chu a ropui khawp mai a, mi pawh an tam, kan kal lam leh haw lam senso kan intum vek bakah anmahni hnenah sum tam tak pek a lo ngai tih bak chu a lem a nihna pawh ka hre lem lo, kan inah a dahna bawm siamin kan hung mawi ve a. Award dawn chawlh hnua office ka kai leh niin kan chief secretary-in min ko a, Mumbai-a ka zin chhan min zawt a, ka award dawn chu ka hrilh a, ‘Cheap Award’ min tihsak ta hrep mai a, a sawi belh teuh mai, Mizo sawrkar hnathawk dang pawh dawng an awm nual thute a hre khawp lehnghal a. Zak takin ka office ka pan a, eng mah ka thawk tawh lo. Office ban hlan ka nghakhlel em em mai a. In ka thlen veleh a hranpa liau liaua a hunna tura kan siam atangin ka la chhuak sawk sawk a, ka paih em lo a, ka thukru bo hmiah. Nanga award dawn chu a tak a, i hnawl chhan pah a tak bawk a,” tia a ward dawn chanchin min hrilh chu Cheap Award article pian chhuah chhan a ni. Tun hnaia cheap award ka tih dang ka’n thai leh hlek ang e.
Kumin 2025 India Independence Day khan Forest-a thawk mi pathumin award kan la hriat ngaih loh CM Award an dawng rup mai a. He award hian cheng nuai 2 leh citation a keng tel a, CM hming leh a signature chuang citation-ah heti hian a inziak a: “…for the year 2025 is awarded to Environment Forest & Climate Change Team viz., Pu H. Lalengmawia IAS, Pu NC Saravanan IFS, Pu MZ Singson IFS for their outstanding initiative namley “Holistic Approach in Obtaining Forest Clearance and Revival of Stalled Public Projects” tiin. CM Award hian zawmpui peng a neih sei ka ring.
ZPM sawkarin Assembly-a FCAA 2023 a adopt theihna tura lehkha pawimawh ilo buatsaihtu chu Environment Forest & Climate Change (EF&CC) Govt. of Mizoram a ni lo thei lo a. CM Pu Duhoma anhla kumkhua chu “development hnathawha Forest Clearance” lak harsat chungchang a ni tih kan hre theuh a. Zep nak emaw, Dan siamtute rilru tawmpuiin, Forest humhalh tak tak duhtute chuan Forest Conservation Act, 1980 kha a bung leh chang pakhat mah tidanglam lo/siam that (amend) loha Bible anga hman kumkhua kan duh a. Centre lama BJP leh Mizorama ZPM te eawrh chuan Forest humhalhna Dan chak leh khauh tha ber, FCA 1980 kha an lo duh ve si lo a. Chuvangin he award dawngtute leh FCAA 2023 Adopt hian a inzawmna a neih ngei ka’n ring thla-ri-rawk a.
Forest chhul chhuak, Pu Singson leh Pu Saravanan te hian an naute, hlawh tlemte hlawha hah taka field-a thawkte lakah an inthlahrung ang em ka ti deuh. Ram kang thelh kaihhnawiha nunna hial chan te, mi sa hrâng hlauhawm kara ram venhim lama thawk, malaria leh ramhnuai natna vei phah te, duty lai thingzar tlain a vuak hliam leh thi ta te; tin, Forest vengtu (guard) vuakhlumte kha an awm tawh lo maw? Ka chiang chiah lo. Hengte hi cheng singkhat den den keng tel award pe se a awm zawk em em a. A dawngtute hi thla khatah cheng nuai tel hlawh vek an ni si a. CM award ken tel tangka fai tam viau mah se a hlu lo. An award dawn hi “cheap award” tihsak em chu ka duh lo a, a phuahchawp lutuk bakah India ram Forest tih chereuna, FCAA 2023 nen a inzawma ka hriat vangin a cheap ka ti. Ka mimal ngaihdan mai phei chu a ni e.
Forest department-a thawkin FCAA 2023 Adopt an duh ta tlat hi, ‘Forest department hian Forest an phatsan em ni’ tiin zawt ila, zawhna awm lo a ni lo ang. A chhan chu- Parliament in hniha FCAA 2023 passed a nih khan, Indian Forest Service (IFS) retired rualin “FCAA 2023 hi India rama Forest tih chereuna tur a ni,” tiin Supreme Court -ah an khing a. Chung mite chu Forest Conservator lo ni tawhte an ni a. Pu NC Saravanan IFS (direct) leh Pu MZ Singson IFS (promotee) te hi Indian Forest Service an nih ve avangin, FCAA 2023 chu an colleague te’n India ram Forest tihchereuna tia Apex Court-a an khin laia State Assembly-a adopt tura hma an la hi Forest phatsanna tih loh rual a ni lo. Ministry-in an nawr lui a nih pawhin zau zawka mipui ngaihdan lak phawt loh chuan an ngam lo tur niawm tak a ni. A meizanghlaptu ber nia lang: Pu H. Lalengmawia IAS (promotee) chu pawn lam mi a ni a, FC lak awlsam a, Forest thiah duai duai thuai a pawiti lem lo a nih pawhin a ngaihthiam theih a ni mai thei. IFS pahnihte hi chu engti kawng maha hriat thiam theih an ni lo a. Mizorama environment renchem leh humhalh tuipuitute tan phei chuan a chhe zawnga hriat reng an ni tawh ang.
CM awardee te hian, Forest Clerance (FC) lak awlsamna turin an thawk tha a, tangka fai cheng nuai hnih leh citation an dawn phah hial a. FC lak awlsam nana an thawh chu eng nge, engtin nge lak a lo awlsam tak dan leh lak harsat laia a harsat chhan min hrih sela a lawmawm hle ang.
Tuna kan sawi mek CM Award hi chuan, ramngaw leh nungchate humhalh kawnga tha lo thawh thin field staff te, misual leh dept dangte kamchhia leh hmuhsitna pemah chingal a leih a, an hliam a tipun thar leh hial thei ang a, kang thelhnaa hliam tuar a, kut tualleichham leh nunna chan ta nupui leh fate tan hian, EF&CC department compassionate appointment te hi an pek ka la hre si lo a, chutih laia Forest chereuna kaihhnawiha Indian Forest Service (IFS) pahnih award dawn hi a inhmeh lo hlein ka hria a. A dawngtute hian a bul lama ka sawi, ka pi ang khian ‘cheap award’ a ni tih pawm ve tal teh se.