Forester leh Forest Guard

Environment Forest & Climate Change department-in forester 15 leh forest guard 25 lak hna a kalpui mekah walking test chu nimin khan zawh fel a ni a. Hetih lai hian, khuarel chhiatna leimin ect. avanga tel ve hman lo candidate-te tan September ni 13-ah Walking Test hi neih leh tur a ni. Walking test atan hian darkar 4 chhungin mipain km 25 leh hmeichhiain km 14 an thlen hman a ngai. Hnaruak 40 inchuh hian candidate 3000 chuang an awm a ni.
Forest venhim hna hi a pawimawh ang huin EF&CC hian, thawktu indaih loh vang nge, a nihna tur angin forest venhim hna hi a thawk zo lo hle niin a lang. Tunhma deuh khan, rawtuai khawrh khap a ni a, bazar leh khawlaia rawtuai zawrh chhuah an man vak vak a, ‘Ngaizel khama rawtuai paih’ te pawh thawkkhat lai chuan a lar hle kha. Rawtuai khawrhtu man lovin a rawtuai zawk chungah leh a zuartu chungah an tuan ta vak vak mai a ni ber a. Chumi awmzia chu, ramhnuaiah rawtuai khawrh thin vai turin forester/forest guard an vak chhuak lo tihna a ni. Rawtuai hi a entirna mai a ni a, dan kalha forest produce hrang hrang leh, nungchate thlengin, ramhnuaia dan kalha chete kuta man (red handed) sawi tur an tam lo hle a. Chutih laiin a ruk a rala sa kap, sangha hrai/bomb, sava hrai, sava kap etc. bakah a ruka thingzai etc. te hi ramhnuaia an ti lai man lovin, engkim pawi an khawih a, Mizoram leilungin a tawrh vek tawh hnuah, check gate-ah an lo man a, chu chu kalphung a ni deuh ber mai awm e.
Forest venhim tih hian a kawh ber chu, khing a chunga kan sawi leh thildang tam tak la sawi lan loh, dan kalha ti turte lo dang tura thawhchhuah hi EF&CC hna pui ber a ni a. Thil tihchhiat a nih tawh hnua a tichhetute man chhuah aiin, an tihchhiat hmaa lo dan kha ‘venhim’ tihin a tum ber chu a ni.
Chuvangin, check gate paltlang chauh veng lovin, a hmun, ramhnuaiah forester leh forest guard-te hian ramhnuai an veng tur a ni a, silai leh hmanrua tha tak nen thuam tur an ni bawk awm e. Tuna ramhnuai veng tur mi heti zat lak thar turte hian forest venhimna lamah hlawk taka an thawh theih nan tuna “Walking Test” an neih mek ang hi, an hna an zawm hunah pawh, khawchhung leh office hul hliap leh check gate bula thu nileng vel mai mai lo turin a practical-in chhunzawm ngei se, chu chu an hna dil mekin a phut chu niawm tak a ni.