National Highway 306 (A) Vairengte leh Aizawl inkar kawngpui, NHIDCL-in an laih zauh tura zangnadawmna sem tawh chungchang, RTI hmanga an zawhna chhanna behchhanin MJA Kolasib District chuan a chhuizui hna a thawk tan a, Inrinni khan Bilkhawthlirah kalin khawtlang hruaitute an kawm. Hriat theih chinah thil felhlel awm ngeia a lan thu an sawi.
MJA-in a chhuinaah hian Bilkhawthlir Village Council-a VCP pakhat chuan a thianpa pakhat chu VC pass a pek thu a sawi a. Hemi hian CALA (Competent Authority for Land Acquisition) in a siamsak ve dawn, tia a dil angin VC pass hi dahkhah loh (blank) in, hming a sign a, a pe tih a lo hrilh. VC secretary pakhat chuan hei hi a hriat pui loh thu sawi tih MJA hian an sawi a. CALA-in siamsak tura a ngen angin an siamsak tih chu a hria a, tutute nge an siam a hre loa, VC pass blank petu VCP thusawi hi a hriatpui ve lo niin a lo sawi a ni.
VC secretary pakhat chuan YMA Kualmawi Branch (Bilkhawthlir) in an enkawl ram, ‘Social Forestry ram bula kawngpui hlui kalna chu a tirah surveyor-ten compensation pek tawhna a nih avangin ‘mark’ theih a ni lo tih an sawi a. Mahse, a hnuah helaiah hian VC pass a lo awm leh ta tih a lo hrilh a. RTI chhanna atanga a lan danin helaiah hian mi pakhat hnenah compensation pek a ni a, kuhva kung puitling engemawzat a awm tih tarlan a ni.
Cheng nuai 200 chuang compensation pek chhuahna ram pakhat chu MJA-in an zirchiannaah, compensation latu hian a lakna ram hi cheng nuai 60-in a lei tih hria in, a ram leina pa an kawmnaah kawngpui kalna tur chin, metre 300 vela sei chu nuai 60-a a hralh thu leh a leitu hian sum a pek tlak nghal vek thu a lo hrilha. Cheng nuai 200 chuang compensation lakna tur khawp thlai a awm em tih zawhna chu a hriatthiam bik loh thu in a chhang. RTI chhanna atanga a lan danin helai ramah hian kuhva leh thlai chi hrang hrang a awm, tih a ni.
YMA hruaitu pakhat an kawmnaah Social Forestry huamchhungah YMA hminga an zangnadawmna lak tur angte an lak thu leh lak loh hlawm khat an la neih thu hriat a ni a. Hetihlai hian helai hmuna mi pakhat hminga pass lo awm chu an hriatthiam loh thu a sawi. CALA hnenah pawh VCP hoa kala thil an zawhfiah thu sawiin, CALA hian surveyor-ten an teh a, ram awl awm ta chu mi pakhat tan pass siamsak a nih thu a hrilh nia sawiin, social forestry atan hian tunhmain khawtlang hmangaihtu mi engemawzatin an pass an lo surrender tawh a. Chutiang a nih laia mi tu emaw hnena compensation pek a ni ve ngawt chu an ngaihdan a ni lo hlawm hle tih a lo hrilh tih Kolasib MJA hian an sawi.
MJA Kolasib District president Andrew Vanlalauva chuan four lane compensation chungchangah hian mipui atangin sawi neuh neuh a tam a. Thil fel lo a awm leh awm loh chhui hi an tan hlawkna a awm loa, chutih laiin tunhma atang tawhin Kolasib hi compensation chungchangah sawi an kai fo tawh tih a sawi. “Kan rama hmasawnna hna thawh a nih dawn apiang hian compensation chungchangah kan ri luih luih fo a. Nakin zelah compensation hi a la awm zel thei a, chutiang hunah pawh mi diklote an fimkhur a, khaw eng pawh zah loa thiltih hi a bo theihna’n tiin hma kan la a ni,” a ti. An thil chhuichiannaah mimal tumah an bei loa, an hmalaknaah mimal hming a lo lang a nih pawhin anmahni an huat vang a ni lo tih a sawi a. A tul anga thuneitute hnenah pawh thlen an tum thu a sawi a ni.
Four lane compensation inpek danah felhel a awmin a lang – Kolasib MJA
